خلاصة كتاب التهذيب الإيجابي اول 3 سنوات - الفصل 2

باقي فصول الكتاب من هنا 

الفصل الثاني : مبادئ التهذيب الإيجابي للعائلة

- أعرفي إن كل الصفات اللي عايزة ابنك يكونها لما يكبر هتتعبك و هو صغير ، عايزة إنسان مستقل، مفكر، مصمم على هدفه، لازم تتحملي طفل مستقل ، مفكر ، مصمم علو هدفه بكل المشاكل اللي هيعملهالك، لكن لو حاولتي تخليه يسمع الكلام و يسكت و مايحاولش يكسر ويخاف منك، ماتتوقعيش لما يكبر يكون حاجة غير اللي زرعتيه فيه. 

- الدراسات بتقول إن الطفل اللي عنده تواصل أكبر مع أسرته و مدرسته و مجتمعه هو أقل إحتمالية إنه يسئ التصرف، فالطفل المحبوس طول اليوم في البيت اللي مابيشوفش حد غالباً هيسيئ التصرف وخاصة قدام الناس.

- Discipline   التهذيب بتتقال دايما على العقاب، لكن هي بالعكس أصلها من كلمة لاتينية يعني التعليم و التعلم. 

- العقاب فكرته إن الطفل يدفع تمن اللي عمله غلط، لكن التهذيب معناه إن الطفل يتعلم من اللي عمله غلط. 

- العقاب وسيلة قصيرة المدى ، هتنفع معاكي في موقف فتحسي إنها وسيلة كويسة لكن على المدى البعيد هي بتخلق طفل عنيد و عصبي و متوتر. 

- قواعد التهذيب الإيجابية: 

١- الإحترام 

إحترام الأهل لنفسهم و لطفلهم و إحترام أدميته ( مافيش أي غهانة لفظية أو جسدية لأي حد في البيت )

٢- فهم ما وراء الفعل

كل إنسان حتى الأطفال بيعملوا الحجات لسبب، فلازم نبذل وقت وجهد في فهم ليه الطفل عمل حاجة غلط ( لو الطفل وقع الميه وغرق الأرض، ممكن يكون كان بيحاول ياخد الميه من على الطاولة علشان عطشان! )

٣- فهم مراحل نمو الطفل و تطوره

ده هيساعد الأهل عدم توقع أو مطالبة الطفل بشئ فوق مستوى فهمه و نموه. ( هل شوفتي أم بتزعق لطفل سنة وبتقول قولتلك عشرين مرة ماتمسكش الزبالة؟ ، الطفل في عمر سنة، عمره ما هيفهم اللي أنتي بتقوليه ده، ولا يتحكم في رغبة في إكتشاف إيه جوا الزبالة،  دش مش مشكلة الطفل ، دي مشكلة الأم دي إنها مش فاهمة مستوى فهم ابنها في الوقت ده ، ومش رافعة الزبالة فوق!  ) 

٤- التهذيب فرصة للتعلم

تعلم مهارات و خبرات جديدة ( لو الطفل وقع الميه في الأرض، فلما تجيبله فوطة ويمسح الأرض فهي فرصة لتعلم مسح الأرض بالفوطة، و فرصة لتعلم إن لما يمسك الميه بالطريقة دي بتقع)

٥- التركيز على الحل بدل من العقاب

لما الطفل يوقع الميه على الأرض فكر إيه التصرف السليم؟

أزعق للطفل و ألومه؟ هل ده حل؟

أقول للطفل نعمل ايه دلوقتي؟ و نجيب فوطة و نمسح الميه؟
إيه هيحل المشكلة اللي حصلت؟

٦- التشجيع

التشجيع المناسب للتصرف شئ مهم لزرع عادة إيجابية عند الطفل. ( هنعرف أكتر نعمله إزاي في الفصول الجاية )

٧- الطفل يفعل ما تتوقع منه

ببساطة لو توقعت طفلك خايب مابيتصرفش صح هيكون كدا، ولو تعاملت على أساس طفلك ذكي بيحل المشاكل هيكون كدا.
لأن توقعك اللي في مخك بيترجم على هيئة تصرفات منك وانتي مش واخد بالك، فبيخلى شخصية الطفل تتجه في اتجاه التوقع ده  وأنت مش واخد بالك بردو. 

- وسائل التهذيب الفاشلة اللي لازم توقفيها فورا:

الزعيق، الصراخ، الضرب، اللوم، التهديد، التحذير. 

كل دي وسائل مدمرة للطفل، الطفل عمره مابيتعلم وهو خايف أو مش حاسس بالأمان أو متوقع عقاب.

عدم وجود عقاب لا يعني السماح بكل شئ و الفوضي على العكس يعني النظام و التعلم من الأخطاء و تصحيح الأخطاء معا. ( هنتعلم أكتر عن ده خلال الكتاب ).

- سوء التصرف من الأطفال دائما يحدث بسبب إما إهمال الأهل للطفل فيحاول الطفل جذب انتباهم بفعل خطأ، أو لأنه فقد إحساسه بالإنتماء للأسرة فبيتجه لمحاولات لمضايقتها.

- لازم نفرق بين اللي الطفل محتاجه و اللي الطفل عايزه، اللي محتاجه هو الأكل و اللبس و دكتور يتابعه و حب و دفئ في الأسرة ، و ده لازم نلبيه للطفل، طالما جيبناه للدنيا دول لازم يبقوا موجودين. اللي عايزه لازم يكون في حدود ، هو عايز موبايلك المفروض نحط قاعدة مايمسكش الموبايل تماما ماينفعش مرة اه و مرة لا ، هو عايز يمسك السكينة ويقطع ماينفعش تماماً عشان ده خطر، هو عايز يلعب بكرتونة الجهاز الجديد اللي اشترتيه، ده مافيهوش أي خطر فنسمح بيه.

- ٤ احتياجات للطفل أساسية لتنشئته سوي نفسياً باقي حياته ( و تبدأ من الميلاد ) 

١- إحساس بالانتماء للأسرة غير مهمل او منبوذ. 

٢- إحساس بالقوة و القدرة، لازم يكون له حجات بيعملها بنفسه مش كل حاجة ماما بتعملهاله لأنه صغير ومش هيعرف يعملها. 

٣- إحساس بالمشاركة ، لازم يشارك إجتماعيا في الأسرة في الكلام و الحوارات.

٤- تهذيب إيجابي و قواعد لتعليم الطفل. 

باقي فصول الكتاب من هنا