الجزء الثالث
- لمشاهدة باقي الأجزاء من هنا
هل طريقة التهذيب بدون دراما تؤدي لإفساد الطفل؟
ما إحنا اتعلمنا بالشبشب و بالضرب و طلعنا زي الفل، إيه أحضن الواد ده لما يغلط؟ ده يستاهل ياخد على دماغه.
ده كلام لبعض الأمهات للأسف، و عايزين نوضح بالتفصيل الرد عليه لأنه متكرر، ومهم يكون عليه رد.
للرد على ده يتلخص في:
إحنا مش زي الفل و لا حاجة، إحنا جيل كامل - مش عارف ياخد قرارات بنفسه، بيسهر طول الليل يفكر ويلوم نفسه over thinking ، - مش عارف يتعامل في فريق و لاحتي مع شريك حياته ( نسبة الطلاق في مصر 50٪ و نصهم في أول سنة من الجواز) ، مش عارف يتحكم في مشاعره ( نص اللي اعرفهم بيقولوا مشكلتي إني عصبي أو متسرع ) ، مش عارف يتعاطف مع اللي حواليه ( 48 ٪ من البنات في مصر بتتعرض للعنف الأسري من الأب و 50% من الأزواج) ، حوادث قتل عشان 50 ج ولا مين يحاسب على الشاي في القهوة!
تعرفوا ايه سبب كل ده؟ له أسباب كتير من ضمنها العقاب و وسائل التهذيب الفاشلة اللي أهلنا استخدموها و احنا صغيرين ، و اللي دمرت عقلنا و مشاعرنا و ثقتنا في نفسنا.، اللي خلتنا نستخدم الجزء الأسفل في عقلنا أكتر من الجزء الأعلى.
أنا هنا مش بلوم أهلنا، هما عملوا أقصى حاجة قدروا عليها، لكن بلوم الناس اللي بتستخدم نفس الأساليب دي و بتتوقع ولادها زي الفل، لا مش هيطلعوا زي الفل هيطلعوا زينا مليانيين نفس العقد!
زمان كان المربيين بينصحوا ماتشيلش الطفل عشان مايتعودش على كدا و هتفسده، لكن دلوقتي العلم أثبت عكس ده، العلم أثبت ان الحب و العاطفة و الوقت اللي بتقضيه مع طفلك هو اللي بيبني طفلك.
العلم اثبت ان الافساد بيجي من تحقيق كل رغبات الطفل، لما تجيبي لابنك كل شوية لعبة عشان زهق من لعبه لأنك حرمتيه من الملل ، الملل اللي هيخليه يبتكر طريقة يسلي بيها نفسه فجزء جديد من عقله يشتغل ، لما ابنك مايعملش الواجب و تقومي عاملاه الواجب أنتي الصبح قبل مايمشي المدرسة ده إفساد لانك حرمتيه بتحمل نتيجة خطأه فهيتوقع ان دايما لازم حد في الحياه يشيل عنه اخطائه. انك لما تقوليله يحط هدومه اللي بيحبها في الغسيل و مايحطهاش فتاخدي هدومه تحطيها في الغسالة انتي عشان لما يحتاجها يلاقيها ، انتي بتحرميه من تجربة نتائج الكسل، لما تشييلي طبقه مكانه وهو 5 سنين عشان يا حرام هو لسه صغير! ده إفساد لأنك بتحرميه من تعلم قيمة تحمل المسؤلية والمشاركة ، إنك لما تلاقيه بيحاول يطلع السرير ومش عارف ، تروحي تساعديه من غير مايطلب، لأنك حرمتيه من متعة التجربة والإحساس بالنجاح و الإنجاز بعد ما يوصل بنفسه.
كام أم بتعمل الحجات دي، وبتفتخر إنها بتعملها لأنها بتشوف نفسها بتضحي عشان ولادها، و بتفني حياتها في خدمتهم؟
للأسف بقولك إنك بتفسدي ولادك ، إن مش الحضن والبوس والدلع و الهزار مع ولادك اللي بيفسد، لكن إنهم مايشلوش الطبق مكانهم، مايرتبوش ألعابهم ، مايساعدوش في شرا حجات البيت وترتيبه ده اللي بيفسد.
في مصطلح جديد اسمه الأم الهليكوبتر ، اللي بتلف حوالين ولادها عشان تمنع عنهم أي حزن أو ألم، و ده مش صح ، إحنا المفروض نكون موجودين مع ولادنا و هما بيحسوا بالحزن و الألم مش نمنعهم من الاحساس بيه ، لأنهم لازم يختبروا الحياه بكل مشاعرها ، و لو اتمنعوا منهم دلوقتي هيكون الألم أكبر لما يكبروا، و مش هيكونوا اتدربوا على التعامل مع المواقف الصعبة و ازاي يسيطروا على مشاعرهم .
العلم الحديث اثبت إن كل وقت و حضن و اهتمام بسماع كلام ولادنا ، بيطور عقلهم و بينمي ذكائهم، و ان تعاطفك و تواصلك مع الطفل وقت غضبه او حزنه بإنك تطبطب عليه و تقوله أنا هنا ، ده اللي بيطور شخصية طفلك و بيعلمه حاجات كتير.
فهل هنصدق العلم الحديث و لاهنسمع نصائح اللي حوالينا؟
- لمشاهدة باقي الأجزاء من هنا
صفحتنا على الفيس بوك من هنا
وملخص كتاب التهذيب الإيجابي من هنا
ليست هناك تعليقات:
إرسال تعليق