ليه بنتي مش لابسة حلق؟ ليه ماخرمتش لبنتي ودانها؟

ليه ماخرمتيش لبنتك ودانها؟ ليه بنتك مش لابسة حلق؟ ليه سايبة بنتك زي الولاد كدا؟ 

دي أسئلة كتير بتسألها من الناس حواليا، أصحابي وأهلى، وحتى ناس ماعرفهاش، وخاصة إني أنا لابسة أكتر من حلق، فإزاي أنا عاملة كدا وبنتي لأ، فقررت أكتبلكم عن الموضوع ده علشان نتشارك الأفكار.. 

الحقيقة هي الإجابة بسيطة جداً ..

شايفين عنوان الموضوع ، وأنا بكتبه وقفت عنده ليه ماخرمتش لبنتي ودانها؟ إيه؟ خرمت جسمها؟ المفروض ده يكون التلقائي يعني إننا نخرم جسم بعض  :D 

ببساطة أنا شايفة السبب الرئيسي إن جسم بنتي هو ملكية خاصة بيها هي لوحدها تماماً، عايزة أعلمها إن مش من حق حد حتى أنا أقرر أغير فيه حاجة، مش من حقي أقرر لها تخرم فيه إيه وماتخرمش فيه إيه حتى لوحاجة معتادة والناس أغلبها بتعملها.

وخاضة إن ضررها أكبر من فايدتها دلوقتي.

وببساطة بردو لما هتكبر وتطلب مني تلبس حلق، هأقعد معاها وأشرحلها بيتعمل إزاي، وإزاي إنه هيفضل طول حياته ،هأخدها وهنروح مكان خرم الودان و هتخرم وهتلبس حلق، بس وقتها هيبقى قرارها، أخدته لما كبرت، وعرفت تتكلم وتعبر عن نفسها و تشوف إنه إحتياج ليها.

بالإضافة للسبب الرئيسي ده في أسباب فرعية تانية زي:

أولاً خرم الأذن في السن الصغير جداً بيكون غير دقيق وبيتغير مع الوقت، اسألي أصحابك وشوفي كام واحدة أخرام ودانها مش مظبوطة. وفكرة إن الخرم بيقفل مش صح دايماً، الخرم لو فضل فيه حلق لمدة سنة غالباً مش هيقفل مدي الحياه، فلو كبرت وكان في مكان غلط، هيفضل موجود مدى الحياه.
بالإضافة أعرف بنت شخصياً مابتحبش الحلقان، ومتضايقة من شكل الخرم في ودانها بدون حلق.

ثانياً خرم الأذن ممكن يكون مؤلم للطفل الصغير - في أطفال بتحس وأطفال لأ - ، لكن يحتمل  للكبير وخاصة لو قراره، فليه أألم بنتي بإيدي حتى لو ألم هيتسمر دقيقة واحدة، و بدون داعي. 

رابعاً مش عايزة يرتبط جمالها طول حياتها بلبس الحلق، لما تبدأ مرحلة الوعي وتلاقي نفسها لابسة حلق هتعتبره جزء منها، لكن اللي حابة تكبر عليه إني جميلة زي ما أنا بطبيعتي وإني مش مخلوقة بحمصة في وداني هي اللي مخلياني جميلة أو مخلياني بنت، لأ أنا بنت وجميلة بدون أي حاجة خارجية، ولو عايزة أبين للناس إنها بنت ففستان وتوكة كافيين جداً.

وأخيراً مش كاتبة الموضوع للجدال أوأي تعليقات سلبية، كتبته لتوضيح وجه نظر بس، وبحترم حتى وجهه النظر العكسية، وفي الآخر هو حرية شخصية.

دمتم بخير :)