خلاصة كتاب التهذيب الإيجابي أول 3 سنوات - الفصل 5

باقي فصول الكتاب من هنا 

الفصل الخامس: كيف أبدأ؟ أدوات التهذيب الإيجابي

- الفصول السابقة تكلمت عن الطفل وإزاي عقله بيشتغل، وعرفنا أهمية التهذيب الإيجابي و سبب فشل وسائل العقاب التقليدية وتأثيرها على الطفل وإزاي بتدمر عقله وشخصيته، في الفصل ده هنتعلم أدوات تساعدنا في تطبيق التهذيب الإيجابي، اختار منها و طبق مع طفلك اللي يناسبكم أنتو الأثنين.

١- اعمل علاقة قوية مع الطفل قبل ما تحاول تصحح له

مش هيكون في تهذيب إيجابي و طفل سوي بدون علاقة مع الطفل قوية، علاقة فيها حب و احترام للطفل، علاقة بيتقال فيها للطفل بحبك و لو سمحت و شكرا و بيتبذل مجهود علشان بيتفهم فيها الطفل عايز ايه بالظبط. 

لما تلاقي نفسك بتقف قدام الطفل و تتحداه اعرف ان في حاجة غلط ، وانك بتساعده علشان يتعلم مش بتتحداه انه يتعلم و تعاقبه لو ماتعلمش.

٢- أشرك الطفل معاك ( أديله اختيارات يختار منها ، خليه يساعدك في الحجات اللي بتعملها) 

الطفل بعد أول سنة إعتماد كامل على الأم محتاج يحس بإنه عنده قدرة و اختيار ، اسأله دايما سؤال وقوله اختيارين مناسبين ليك ، تحب تفطر شوفان و لا فاكهة؟ قرر أنت ، ضيف دايما " قرر أنت"  للسؤال ، عشان يفهم معنى القرار و يحس انه له رأي و بيتاخد بيه. 

اطلب من الطفل يساعدك، بدل ما تقوله حط الكوتشي بتاعك عند الباب، قوله ممكن تساعدني نودي الكوتشي عند الباب، الاطفال بتحب تساعد اكتر ما بتحب تاخد اوامر.

٣- اعمل روتين لحياة الطفل

الاطفال بتتعلم بالتكرار ، وبترتاح و هي متوقعة ايه هيحصل ، اعمل نظام للنوم و للاكل و الخروج كل يوم بنفس الترتيب. 

لما الطفل يكبر خليه يشارك معاك في كتابة و رسم الحجات اللي بتعملوها كل يوم، و اسأله ده وقت ايه هنعمل ايه دلوقتي ايه بعد كدا 

ماتتوقعش الطفل اللي بيسهر ل 1 بليل ونومه ملخبط و مابياخدش كفايته من النوم بليل إنه يحسن التصرف لأنه بيكون غير متزن و عقله مشوش، وقلة النوم بليل في الضلمة تماما بتأثر على نمو الطفل. 

٤- علم الإحترام بالفعل مش القول

قبل ما تطلب من الطفل يحترم الكبار، احترمه هو ، ماتقاطعهوش و هو بيلعب، ماتطلبش منه حاجة باستعجال، وطبعا ماتزعقش او تحتقره. 

ماتاخدش الطفل فجأة وهو بيلعب مع الأطفال، كلمه وقوله لازم نمشي واتفقوا على وقت مثلا ٥ دقايق واظبط تايمر التليفون ولما يرن تمشوا. 

٥- استخدم روحك المرحة

النظام مش معناه تبقي أم غلسة، بالعكس ، غني مع طفلك وهو بيغسل سنانه، تحديه مين يلم مكعبات أكتر و انتو بتنصفوا الاوضة، تسابقوا تجيبو حاجة من اوضة تانية. ماحدش يحب يعيش مع حد رخم و جد طول الوقت.  

٦- ادخل في حياة و عالم طفلك

افهم الطفل و تعاطف معاه، لو اتفقتوا على وقت الطفل يسيب فيه الحديقة، وهو رفض، احضنه وقوله انا عارف انك عايزة تقعد بس لازم نمشي دلوقتي زي ماتفقنا، اديله كمان فرصة للتعبير عشان مشاعره اسأله انت متضايق؟ محبط؟ و ابدأوا اتحركوا ، الطفل بيتعلم من الموقف ده انه يقدر يتعايش مع الاحباطات ومش كل اللي عايزه بيحصل، و بيتعلم ان كلام الام واحد وانها مش مترددة، و رغم انه بيتعلم حجات صعبة الا انه بيتعلمها لانه بيحس بحب و عطف من الام. 

كمان اسأل نفسك في كل المواقف لو انا مكان الطفل كنت هاعمل ايه هتحس بيه اكتر و تفهمه اكتر. 

٧- خلى كلمتك واحدة، و افعالك هي كلامك. 

قبل ما تقول اي حاجة للطفل خد لحظات و فكر هل لو الطفل عيط او صرخ هارجع في كلامي؟ هل الحاجة اللي بيطلبها الطفل فعلا هتأذيه أو مهمة وخايف عليها ولا عادي ياخدها يلعب بيها شوية؟ 

التردد هيخلي الطفل يسيطر على الأم ، و يعرف امتى هتوافق بعد عياط ولا صريخ ولا خبط راسي في الحيط، الاطفال بتختير حدود الامهات كل شوية فكوني محددة و واضحة ماتكونيش مترددة أبدا. 

أوقات بيكون التصرف السليم انك لازم تاخدي الطفل وتطلعوا من المكان اللي أنتي فيه بدون مناقشة، ده بيحصل عادي طالما مش دي القاعدة في كل موقف، فلازم تكوني حكيمة و تعرفي امتى تتصرفي بحزم بدون مناقشة.

٨- كوني صبورة 

فهمك لمراحل تطور الطفل لازم تنعكس عليكي صبر في تعليمه نفس الحاجة مرات كتير ، و الصبر عليه ، ممكن تحاول تعلمي الطفل يشارك لعبة مع حد ، وهو يرفض، افهمي ان دي طبيعة سنه ماتحكميش عليه انه اناني او بيسئ التصرف، لكن سيبيه يعيش مراحل تطوره براحته، و استمري بتعليمه المشاركة مرات كمان تانية. 

٩- أعد توجيه الطفل

بدل ما تقول للطفل خلى بالك ماتطلعش من باب الشقة المفتوح ، روح خد ايده بالراحة و دخله وقوله هنقفل الباب، بدل ماتقول للطفل ماتضربش البيبي، امسك ايده ومررها على ايد البيبي بالراحة و قوله بنمسك البيبي كدا بالراحة، وري الطفل التصرف السليم ماتقولهولوش و ماتقولوش ماتعملش الغلط، لكن وريله الصح.

١٠- تقبل اختلاف طفلك عن الاطفال التانية.

ممكن طفلك مايبقاش زي طفل صاحبتك اللي بيفضل قاعد في مكانه في المطعم ، لكن ابنك بيحب يقوم كل شوية، تقبل اختلافه، حل الموقف مش انه يبقي زي ابن صاحبتك، حل الموقف تروحي مطعم مناسب أكتر للاطفال، او تسيبي ابنك مع زوجك و تخرجي مع صحبتك تروحي، او تستني لما ابنك يكبر اكتر و تروحي. عدم تقبل الطفل مش هيخليه زي ابن صحبتك الهادئ بالعكس هيزود غضبه و غضبك و هيأثر على علاقتكم و هيخليه يسئ التصرف. 

Time-out  وقت الإستراحة

طبعا ده اترجم عندنا ركن العقاب وماعرفش إزاي، طبعا مافيش عقاب في التهذيب الإيجابي لكن في وقت الإستراحة، لان المخ وقت الغضب في جزء منه مابيشتغلش بيخليك ماتفكرش بوضوح، فمطلوب وانت غضبان ماتتناقش مع الطفل، فبتنفذ وقت الاستراحة ليكم انتو الاتنين بشروط : 

- الطفل لازم يكون فوق ٣ ونص أو أربع سنين ، لأنه الهدف من وقت الاستراحة الطفل يفكر عمل ايه و أدى لإيه، لكن قبل ٤ سنين الطفل ماعندهوش القدرة دي على ربط الأحداث بالأسباب، فركن الاستراحة قبل ٤ سنين هيأدي لطفل حاسس بالذنب و الخوف ، و المناسب قبل ٤ سنين رقم ٩ فوق، اعد توجيه الطفل . 

- وقت الاستراحة هدفه الطفل يشعر بتحسن، فلازم يكون مكان مريح الكنبة مثلا ، ولازم يتطلب من الطفل يروح بطريقة كويسة زي مثلا انت محتاج ترتاح و تفكر في مكان هادي في اللي حصل، روح للكنية هنا و فكر و بعد شوية نتكلم. 

- وقت الاستراحة ممكن ياخد اشكال تانية زي انك تحضن الطفل مثلا، انك تاخده و تنزلوا تتمشوا برا البيت، اوقات الطفل بيسئ الاصرف لانه محتاج حنان او لانه زهقان بس مش عارف يعبر عن ده 

باقي فصول الكتاب من هنا