دليلك للتسوق الذكي في يوم البلاك فرايداي

إيه هو البلاك فرايداي؟ 

في أمريكا عندهم أهم عيد في السنة هو الكريسماس 25 ديسمبر، في الكريسماس ده كل الناس بتجيب هدايا لكل العيلة وممكن للأصحاب، وخاصة الأطفال بيجيلهم هدايا من خالاتهم وعمامهم و أجدادهم.، فطبعا ده أهم موسم بيع لكل المحلات، عشان كدا عملوا فكرة يوم البلاك فرايدي، إن ليوم واحد في السنة هنرخص أسعار حجات كتير جداً فالناس تشتري فيه الهدايا، وطبعاً دي win-win game  لأنها سياسة تسويقية علشان لما يزنقوا الناس في يوم واحد، فالناس تحس إنها لازم تلحق تشتري وماتفوتش العروض فتشتري زيادة عن حاجتها فالمحلات تكسب أكتر.  ، يوم البلاك الفرايداي هو آخر جمعة من شهر نوفمبر، بيكون تاني يوم عيد تاني بردو عندهم اسمه عيد الشكر Thanks giving.

اعرف إزاي العروض؟

كل محل بيبدأ ينزل العروض في إعلان كذا صفحة، من أول شهر نوفمبر على موقعه، بس بدل دخول كل المواقع، هتلاقوا الإعلانات كلها متجمعة على المواقع دي: 

blackfriday.com

theblackfriday.com 

dealsofamerica.com

ولو جنبك أوتليت Outlet  بيكون في عروض كتير على الماركات الكبيرة ، ادخل على الموقع بتاعه وشوف عروض المحلات.

إيه أنواع العروض؟

1- Doorbuster  دي عروض بكمية محدودة موجود في المحلات، أول ما المحل بيفتح (غالباً يوم الخميس الساعة 6 أو 10 بليل أو الجمعة الصبح بدري، بتختلف حسب المحل) ، بيكون في كمية محدودة من الحاجة دي ، مثلا bestbuy  بيعمل تليفزيون قيمته $200 ب $100 بس، و ده لأول 50 واحد بس. فالناس بتروح تقف قدام المحل قبل ما يفتح و أول 50 واحد بس بيقدروا ياخدوا العرض ده. 

زمان كان في فيديوهات لناس بتدخل المحل وتتخانق وتضرب بعض عشان الحجات دي، بس دلوقتي الموضوع بقى منظم أكتر، لما بتروح تقف قدام المحل بيكون في منظمين من المحل بيدوا لكل واحد كوبون عليه رقم واسم العرض اللي هياخده، فبيكون معروف مين الأول و مين اللي هياخد العرض ده، وبيدخل بهدوء ياخده.

2- العروض الأون لاين

أغلب الحجات النازلة في الإعلان بتكون نازلة أون لاين، حتى مؤخراً بقوا بينزلوا online doorbuster  ، ميزة التسوق أون لاين إنه مريح و بعيداً عن الزحمة واللف بليل.

وكمان ممكن تستعمل موقع إيبات هيرجعلك كاش باك على كل حاجة بتشتريها، ولو سجلت من الرابط ده هيرجعلك $10 على أول حاجة هتشتريها. 

3- rebates

ده هتلاقي مكتوب في الإعلان إن جهاز مثلا ب $25 بعد $20 rebates  ، ده ببساطة معناه إنك وأنت بتشتري الجهاز هتدفع $25 + $20 ، وبعدين هيوصلك خلال أسبوع أو اتنين ال $20 شيك على البيت تشتري بيه أي حاجة من نفس المحل بعد كدا.

4- عروض على كل منتجات المحل

محلات يوم البلاك فرايداي بتنزل ان كل حاجة في المحل 50% مثلا أو 60% ، دي أنا بحبها شخصياً ، وبستفيد منها في شراء اللبس والأحذية خاصة، ومن الماركات اللي عادة بتنزل 50% و ممكن تستفيد بعروضها Gap - Tommy - Reebok - New Balance - Calvin Klien   - Old navy

 للأطفال : Carter's - Gymboree

وحاول تشوف المحلات دي في الأوتليت Outlet  لأن بيكون سعرها أقل من المحلات الأصلية فالتخفيضات بتكون أفضل.

استفيد إزاي  من العروض: 

1- زي ما قولتلكم ، القاعدة الأولى، نشتري اللي محتاجينه فعلاً، لو اشترينا حاجة مش محتاجينها كدا بنضيع كل تمنها، مش بنوفر الخصم، ولازم نحدد ميزانية معينة ونحدد الأولوليات.

ولو عندك حدث هيحصل السنة الجاية ممكن تتسويقي له في اليوم، مثلا حامل وفي طفل جاي، عندك فرح حد محتاجة تجيبي هدية، لو هتنقل بيت جديد ومحتاج فرش وهكذا .. 

لو عايزين أفكار أكتر للتوفير من هنا ومن هنا 

2- نحدد بالظبط محتاجين إيه ومن محل إيه، ماينفعش تنزل تلف و تتفرج يوم البلاك فرايداي، مش هتعرف من الزحمة والحجات اللي عليها عروض زي ال doorbusters  هتخلص بسرعة مش هتلحقها.

فشوف مثلا محتاج تليفزيون و شواية و بنطلون، التليفزيون هتوفر مثلا $100 فاديله الأولوية انك تروح المحل اللي فيه عروض التليفزيون اللي عايزه الأول، لأنك مش هتلحق تلف على كل المحلات وتلحق كل العروض.

3- احتفظ بكل الفواتير، لو اشترينا حاجة وبعد كدا لقينا اننا مش محتاجينها ومافتحنهاش ممكن نرجعها للمحل طالما معانا الفاتورة، بس نلاحظ لو اشترينا أون لاين ، غالباً بنخسر تمن الشحن.

4- لو هتشتري لبس، روح المحل اللي هتشتري منه قبل البلاك فرايداي، اختار اللون والمقاس بالظبط اللي عايزه، وبعدين روح يوم البلاك فرايداي اشتريه على طول بدون ماتقيس، لأن المحل بيكون زحمة وبيكون طابور طويل على غرفة القياس. 

5- خلى بالك عروض الموبايل مابتكونش كويسة أوي خلال البلاك فرايداي، الموبايلات في أمريكا بتكون عاملة عقود مع شركات الإتصالات وبتنزل من خلالها دايماً، فمثلا ايفون دايماً بينزل عن طريق T-mobile  تدفع مقدم $100 و شهرياً مثلا $25 لمدة سنتين، أغلب الأمريكان خلاص بيشتروا كدا، ماحدش بيشتري موبايلات كاش. 

6- ماتنساش تستخدم إيبات و أيبوتا للحصول على كاش باك.

ترشيحات لمحلات:

- محل Bestbuy  للأجهزة الأليكترونية زي لابتوب أو كاميرا.

- محل Old navy & Gap & Tommy $ Calvin Klein  بيعملوا خصم 50% على كل اللبس في المحل، ممكن تشتري جينز كويس من هناك، أو بيجامة للشتا، أو تي شيرتات للولاد.
- محلات Reebok $ New Balance   بيعملوا 50% على اللبس الرياضي و الكوتشيات.

- محلات jcpenny & macy's & Kohls  بيعملوا عروض على أجهزة المطبخ و المكانس.

- محل walmart   & Target  لحجات البيت وأجهزة المطبخ.

- محلات Micheal Kors & Guess  للناس اللي بتحب الشنط، بيعملوا من 30% ل 50% على كل المحل.

- من الأجهزة زي الخلاط أو الكبة ماركة Ninja  من أفضل الماركات. 

- من الأجهزة المفيدة اللي لو محتاجها ممكن تشتريها لو محتاجها: 

-  Tablet Ipad - play station - chrome cast - TV 

-Instant pot - air fryer  - grill - rice cooker.

- خلى بالك من الألحفة و ملايات السرير والفوط ، أو قات بتكون أقمشة وحشة، فلازم تشوفها في المحل الأول.

- محل لبس الأطفال Carter's & Gymboree بيكون عامل 50% ، ممكن تشتري للأطفال لبس السنة الجاية. 

تسوق سعيد ، ودايماً نفتكر إننا بنشتري الحجات علشان تساعدنا على حياه أفضل ، فنشتري بس اللي هيضيف لنا قيمة حقيقية، وعادي جداً لو مش محتاجين حاجة مانشتريش أي حاجة في اليوم ده. لو في حاجة عليها خصم 50% لو اشترتها هتاخد خصم 50%، ولو ماشتريتهاش هتاخد خصم 100%!

ولو عندك نصائح وخبرات خاصة بالتسوق وخاصة في البلاك فرايداي شاركونا بتعليق هنا 

ولو حابين أكتب موضوع عن الحجات اللي اشتريتها في البلاك فرايداي قبل كدا وعجبتني ولا لأ بردو اكتبوا تعليق .

وتابعوا صفحتنا على الفيس بوك من هنا 

وشاركوا التدوينة مع أصحابكم اللي هيتسوقوا في البلاك فرايداي :)