بما إني عشت في دالاس فترة طويلة كحياة طلبة ، فكان مهم عندي أدور على محلات التوفير ، واتعرفت فيها على أماكن و فعاليات وحجات مفيدة حابة أشاركها معاكم ، شاركتكم قبل كدا
أولاً محلات تخفيضات الأكل
فكرة المحلات دي، إنها بتاخد الأكل اللي ماتباعش في محلات كبيرة وغالية زي whole food, sprouts, trader joe's وتبيعه بسعر منخفص، ممكن الأكل بيكون قرب على مدة إنتهاء الصلاحية، و ممكن يكون لسه كتير بس المحلات دايماً بتحب تجدد وتتخلص من المخزون لو ماتبعش خلال فترة قصيرة، لكن بيكون لسه بجودة عالية جداً، وأغلب الأكل هناك أورجانيك وصحي، وأسعاره قليلة جداً.
المحلين دول رائعين، مش بس عندهم حجات أورجانيك أقل من سعر العادي، لكن عندهم خيارات متنوعة جداً ، هتجرب حجات لأول مرة، وهتلاقي حجات جودتها عالية جداً، هتطلع مثلا من المحل بعربية أكل كاملة وتدفع نص اللي بتدفعه في المحلات العادية. المحلين يستحقوا الزيارة وهتنبهروا.
لو المحلين بعيد عنك، جرب تتسوق في ALDI المحل ده رائع وعنده نظام لتقليل العمالة زي إنك بتاخد عربية التسوق وترجعها لمكانها تاني، أو زي إن كل حاجة مكتوب عليها الباركود في 3 أماكن مختلفة فبيخلي سرعة قراءة الباركود وبالتالي سرعة الحساب، و تقليل مساحة المحل زي إنهم بينتجوا حجم واحدة لكل حاجة في المحل ، وهو الحجم الأكثر استخداماً، كل الحجات دي بتخليه أرخص محل ممكن تشتري منه الأكل، وبجودة عالية لأنه في الأصل محل ألماني.
ثانياً محلات المرتجعات
المحلات دي بتاخد الحجات اللي الزباين رجعوها، او اللي ماتباعتش من محلات كبيرة زي costco ,sams club وبتبعها بأسعار مخفضة.
في المحل ده دايماً هتلاقي عروض كويسة، مثلاً هتلاقي طقم حلل ماركة كويسة ناقص منه حلة ، هتلاقي حاجات لمجرد إنها اتفتحت من الكروتة سعرها أقل ، مثلا هتلاقي كرتونة علب عصير ناقص منها علبتين بنص الثمن، واللبس دايماً عنده سعره كويس جداً، كمان عنده أثاث كويس ، وعنده أجهزة كهربائية لكن مافضلش تجيب من هناك.
ثالثاً محلات الأشياء المستعملة
في فكر عند بعض الناس إن ماينفعش أستخدم حجات حد تاني استخدمها، لكن اتعلمت في أمريكا إن ده طبيعي، وإن الناس ممكن تعمل كدا لأسباب كتير زي هواية إنها تتسوق وتجمع حجات مختلفة مش موجودة في المحلات العادية دلوقتي، أو للحفاظ على البيئة فتستخدم حجات كإعادة تدوير بدل من شراء جديد، أو للتوفير لأن سعر الحاجة مستعملة ممكن يكون ربع سعرها جديدة، فماتخليش أفكارك القديمة تسيطر عليك ، وجرب وقيم بنفسك ، ماتحكمش بدون تجربة.
بدأت بالمحل ده لأنه له فروع كتبير جداً على مستوى أمريكا مش بس دالاس، دايماً بلاقي حجات حلوة فيه، خاصة لعب وكتب الأطفال.
المحل ده منظم جداً، ودايماً عند لبس الأطفال جميل جداً، وأدوات البيت، والألعاب.
المحل ده شغال بنظام كل حاجة في المحل نفس السعر، بينزلوا كل الحجات الجديدة يوم الخميس وبتكون كل حاجة المحل ب $2 , وبعدين بتقل ربع دولار كل يوم الجمعة بتكون $1.75 و السبت بتكون $1.5 و هكذا لغاية الأربعاء بيتكون كل حاجة $.25
المحل كبير أوي ومحتاج وقت تدور في الحجات ، بس بتكون في حجات فعلاً كويسة جداً و خاصة أيام الجمعة والسبت و الأحد.
ده على بعد شارعين من المحل اللي فوق، محل منظم، و دايماً بلاقي عنده حجات كويسة للبيت أو لعب أطفال أو كتب أو CDs
أتمني تكونوا استفدتوا من التدوينة وتجربوا المحلات وتعلقوا جبتوا إيه من هناك وإيه عجبكم. ولو عندكم محلات بتساعدك على التوفير ياريت تشاركوها معانا
لتدوينات أكتر عن التوفير في أمريكا من هنا:
ليست هناك تعليقات:
إرسال تعليق