تجربتي : شراء فستان الزفاف من موقع tidebuy

دي كانت أول تجربة شراء من الانترنت ،

 ويمكن تستغربوا إني أغامر بشىء زي فستان الزفاف  ،

  لكن بما إني أخدت قرار الزواج في حد ذاته ، يبقى أي قرار بعده سهل  D:

   الحقيقة كان السبب هو الإغراءات الكتيرة الموجودة
 زي سعر الموقع والموديلات الراقية ، والمقاسات المظبوطة . .

وبعد إستخارة قررت أشتري منه ، وقررت الموضوع يكون سري للغاية  - ماعدا أختي لأنها كانت بتساعدني في الإختيار - :)
 إلى أن يوصل الفستان وتتم التجربة بنجاح أقول لكل الناس :)

وإليكم التفاصيل ..

1- بدأت أبحث عن الموقع وشوفت أراء وتجارب مع الموقع ، وعرفت إيه بالظبط بيليق على جسمي من الفساتين
وهتساعدك الصورة دي ، أو ممكن تنزلي بنفسك تقيسي في محلات الفساتين لغاية ماتستقري على موديل:

2- دخلت الموقع وشوفت كــــــــــــــــــل الفساتين ( حرفياً كل الفساتين ) لمدة أسبوعين بختار واستبعد واختار واستبعد ، واختار واستبعد وأسأل اختي  

 إلى أن استقريت على : 

رابط الفستان على الموقع

وبتقدري تشوفي كل تفاصيل الفستان من نوع القماش ووزنه وغيره تحت صور الفستان على الموقع.

 3- أخذت المقاسات،  بتحددي أي مقاس مناسب من  الـ size chart تحت صور الفستان على الموقع 

هيساعدك الفيديو ده How to measure your size

3- بتعملي حساب على الموقع ، وبتعملي الطلب ، بعدين بتدفعي عن طريق الفيزا أو في طريق تانية اللي يناسبك من المتاح
ولازم تطلبي الفستان قبل الزفاف بوقت كافي ، أنا طلبته قبله بشهرين 

 - بالنسبة للسعر .. الفستان كان بـ 170 $ + 31 $ شحن -

4- تتبع الفستان من الموقع نفسه ، وده قبل الشحن بتعرفي امتى بدأ التصنيع ، وامتى خرج من المصنع  ..   - غالبا تصنيع الفستان 15 يوم -

، ثم بعد الشحن ، تقدري تعرفي فين الطرد موجود حالياً ، من موقع البريد المصري ، أو موقع البريد في البلد اللي أنتي فيها. 

5- الفستان هيوصلك للبيت مع مندوب البريد ، وبتدفعي الجمارك
- في مصر 40% تقريباً من ثمن الفستان - 

يعني بالجنية المصري : الفستان والشحن والجمارك حوالي 1400 ج

ودي صور الفستان بعد الوصول:

الفستان أبيض ، بس الإضاءة مش مظبوطة في الصور :) 

تقييمي للتجربة :
الفستان جميل و خاماته مناسبة  ، التغليف مناسب ،  خدمة العملاء متعاونة ، وقت الوصول بعد شهر من طلب الأوردر - سريع نسبياً - ، والسعر كويس جداً.

بشكل عام حبيت التجربة كتير و استمتعت بيها كتير كتير :)

وصور آخرى للفستان :