تعلم كيف تتعلم هي دورة تدربية مجانية من موقع Coursera
الدورة مهمة جداً جداً لأي حد بيتعلم عشان يفهم عقله بيشتغل إزاي ، وإزاي ينجح في الدراسة والتعلم والفهم.
+ مهمة لكل المعلمين والمدرسين وأولياء الأمور عشان يقدروا يفهمو أولادهم وطلابهم إزاي يقدروا يحصلوا معلومات أكتر وبفاعلية أكبر.
والدورة أسلوبها بسيط ومناسبة لمستويات مختلفة من التعليم.
والدورة أسلوبها بسيط ومناسبة لمستويات مختلفة من التعليم.
لو مافيش وقت تاخد الدورة
دي بعض النقاط المهمة جداً
..
دي بعض النقاط المهمة جداً
..
-1-
إزاي تتعلم حاجة جديدة صح ؟
الخطوة الأولى: ركز
يعني مافيش تليفزيون قدامك ، نظرة على الفيس بوك كل 5 دقايق ، كلمة مع أخواتك كل سطرين .. ركز يعني كل حواسك منتبهة في اتجاه واحدة.
الخطوة التانية: اتفرج ع الصور
يعني اقرأ العناوين الرئيسية ، المعادلات ، الصور ، اعرف أنت هتتعلم ايه بصورة عامة عشان تعرف تربط الأفكار بعدين.
الخطوة الثالثة :أقرأ و أفهم
قسم المادة اللي هتتعلمها لأجزاء وابدأ اقرأ جزء وأفهم اللي بتقراه ، عشان مافيش حاجة مش مفهومة بتثبت في العقل.
الخطوة الرابعة: سمع
استرجع المعلومات اللي عرفتها في الجزء اللي قريته وفهمته و اربطها بأمثلة و اتخيلها ، مثلا لو بتذاكر تجربة معملية ، قوم مثلها و حرك ايدك و على صوتك و استخدم اكبر قدر ممكن من الحواس.
كرر عند اللزوم
مبروك كدا اتعلمت حاجة جديدة صح
______________________
-2-
التكرار يعلم الشطار
أكيد قالولك الجملة دي ، بس ماقالوش يعني إيه تكرار وتكرر كام مرة؟ و إزاي ؟
العلماء المهتمين بدراسات العقل قالوا إن فيه نوعين من التكرار :
الأول : تكرار المعلومة عدة مرات ورا بعض في نفس اليوم.
الثاني : تكرار المعلومة مرة يومياً لعدة أيام.
طيب أي النوعين أفضل ؟
اكتشفوا إن تكرار معلومة مرة يوميا (لمدة 5 أيام ) بينقل المعلومة للذاكرة الدائمة اللي بتحفظ المعلومات للأبد ، فبيساعد على حفظ و تثبيت المعلومة أكثر بأضعاف المرات من تكرار نفس المعلومة عدة مرات متتالية ( 20 مرة ) في نفس الوقت ، لأن في الحالة دي المعلومة مهما اتكررت بتفضل في الذاكرة قصيرة المدى اللي بتتمسح كل شوية.
______________________
-3-
طريقة الطماطم الإيطالية
هي طريقة بسيطة ومبتكرة لتنظيم وإدارة الوقت.
..
ركز 25 دقيقة في الشغل أو الدراسة بدون مقاطعة تماماُ ( لإن ده الوقت اللي محتاجه عقلك للشغل المتواصل لحصول على أفضل النتائج ) + بعد كدا خد لنفسك 5 دقايق مكافئة ( ارتاح - كل - اتمشي - شوف الفيس بوك! ) ... كرر حسب طول مدة الشغل المطلوب ..
= وقتك اتنظم + شغلك خلص + ارتحت نفسياً
لمعلومات أكتر
شوف الفيديو ده
______________________
-4-
إدارة الوقت
علاج التأجيل والتسويف والكسل
1- التنظيم بالأسابيع .. الأسبوع مش قصير زي اليوم ولا طويل زي الشهر ، أبدأ كل مشروع ،او دراسة أو حتى تنظيم للحياه ، ... بتقسميه لأسابيع ثم توزيع المهام الرئيسية على الأسابيع.2- daily "to do" list قائمة المهام الصغيرة اليومية ، والافضل تعملها قبلها بيوم بليل .
3- المكافئات شئ مهم ، لازم مكافئات عند الإلتزام ، اليومية صغيرة والأسبوعية أكبر ، المكافئات ممكن تكون الخروج ، أكلة معينة ، مكالمة صديق ، مشاهدة فيلم ..
4- اصنع روتين لنفسك ، ثبت مواعيد النوم والاستيقاظ ، مواعيد الوجبات ، مواعيد ممارسة الرياضة ، ده هيغير كتير في حياتك للأحسن .
5- ابدأ بالمهام الصعبة أو اللي مش عجباك الأول كل يوم .
6- ماتبدأش كل الخطوات دي مع بعض ، ابدأ باللي هتنجح فيه الأول عشان تستمر.
______________________
-5-
الذاكرة
التمارين الرياضية هي أهم سبب ممكن يقوي ذاكرتك.______________________
-6-
نصائح دكتور نورمان فورتنبيري .. حاصل على بكالوريوس وماجستير ودكتوراه في الهندسة الميكانيكية من MIT :1- الجامعة مش زي المدرسة وخاصة هندسة .. في المدرسة انت بتتعلم وبتذاكر لوحدك لكن في الجامعة انت لازم تكون في فريق لازم تشارك مع فريق اللي اتعلمتوه و تتبادلوا المعلومات والمصادر المختلفة.
2- من المهم جدا تكون فريق وتكبره ولازم تتأكد انهم مجتهدين وجادين تجاه الدراسه.
الفريق ده اللي هيدعمكك وانت هتدعمه .. دايما هتفكروا بعض بالهدف الأساسي زي اننا ننجح في فهم المواد اننا ننجح في الترم الي اننا ننجح في التخرج.
3- لما تحتار في قرار متعلق بالدراسة أو لما تكون الرؤية مش واضحة اسأل الطلبة اللي أكبر منك في الجامعة ، اسأل المعيدين والدكاترة واستفيد من خبراتهم.
4- حاول تتعلم بكل حواسك اكتب وانت بتذاكر ، علي صوتك ، تخيل ، شوف التطبيقات للنظريات اللي بتدرسها.
5- اشرح لفريقك اللي اتعلمته لان احسن طريقة تتأكد بيها انك اتعلمت موضوع انك تعرف تشرحه كويس وتناقشه مع فريقك وتصححوا لبعض لو في معلومات فهمتها غلط ، كمان ده هيساعد في تثبيت المعلومة في عقلك.
______________________
-7-
جوا كل واحد فينا ، في اسطوانة من الطاقة السلبية بتشتغل في أوقات معينة .
الأسطوانة ممكن تشتغل وأنت في محاضرة وتقولك : شوف كل اللي حواليك دول فاهمين كل حاجة وأنت لأ ، أنت مش في المكان المناسب ، أنت مش هتنجح في المجال ده ...
أو تشتغل وأنت بتذاكر وتقولك : أنت مش هتفهم مهما قريت ده صعب ، ده كلام غير مفيد ، المفروض كانوا يحذفوه ، ..
لازم توقف الأسطوانة دي فورا ، لازم ترد عليها بحسم ، لازم تقول انك تقدر ، و تفتكر الصعوبات اللي مرت بيك وقدرت تتغلب عليها .
اعرف الاسطوانة السلبية بتشتغل امتي ووقفها.
خلي أفكارك إيجابية ، تكون حياتك كلها أفضل.
المعلومات من كورس تعلم كيف تتعلم
ليست هناك تعليقات:
إرسال تعليق