الفصل الأول : مرحباً بالطفل
- أهم شئ و أساس كل التربية بناء علاقة من الحب و الود مع الطفل.
- تخيل طفلك وهو كبير وناضج ، إيه الصفات اللي تحب تكون فيه؟ راقي، قوي الشخصية، ناجح ، مرتب التفكير، كل الصفات دي أنت اللي بتكونها دلوقتي والأفعال اللي بتعملها من أول ما الطفل يصحى لغاية ما ينام.
- في أطفال بتتولد في بيت كبير في جنينة و عربية للأم و عربية للأب، و في أطفال بتتولد في شقة من أوضة واحدة، ده مش مقياس لتربية أحسن أو أسوأ، لكن بتعتمد التربية الناجحة على الوالدين وعلى مقدار إستغلالهم للموارد المتاحة، و مدى قدراتهم و فهمهم و مهاراتهم الشخصية .
- الأخطاء أثناء التربية هي مش فشل التربية لكن هي فرصة للتعلم للمربي و للطفل. و فرصة للطفل لتعلم مبدأ إن فشلنا هو فرصة للتعلم مش النهاية.
- من أهم أدوات التربية هي حبك للطفل، فطرتك في التعامل معاه، حكمتك و خبرتك في الحياة، كل ما كان عندك حكمة وخبرات أكتر هتقدر تقدم لطفلك حياة أفضل، وخبرتك وحكمتك هتوصلهم عن طريق القراية والتعلم الدائم والتجارب المختلفة والتعامل مع الناس.
- الحب له صور كتير عند الناس ، و أوقات بتحصل كوارث في التربية و تدمير لشخصية الطفل بإسم الحب، زي الأم اللي بتشتري لابنها كل اللي هو عايزه عشان بتحبه، لكن الحب الصح في التربية لازم يبقي في "لا " وقت اللزوم ، لازم يبقي في حدود و قواعد للحياه ، لازم الطفل يستوعب فكرة إنه عايش مع ناس كل واحد له حقوقه وواجباته.
- قبل حقوق الطفل لازم تفكري في نفسك، لازم وقت لنفسك ووقت مع زوجك ووقت مع ناس كبار مش كل حياتك الطفل، دي مش أنانية لكن بتتعايشي مع الطفل مش بتعيشي عشانه، و لازم يتعلم إن ماما بتعمل حاجات تانية غيره، ماما بتقرأ دلوقتي وهأقعد أعمل حاجة أنا، ماما هتخرج مع أصحابها وأنا هاقعد مع بابا، وده حتى هيخليه يتقبل وجود إخوات في أسرته و شركاء في شغله بعدين وشركاء في الحياه عامة زي الزوجة، شوفي إزاي الزوج اللي بيرفض مراته تعمل حاجة تانية غيره، بيتكون ده فيه من إمتي؟!
- الأب هو شريك أساسي في التربية ، الدراسات بتقول إن الطفل ( بنت أو ولد ) اللي بيقضي وقت أطول مع أبوه بيكون أذكى، و حتى مع أجداده وأقاربه ، اختلاف التعامل معاه من كل الاشخاص بيديله أبعاد جديدة في شخصيته وتقبل للإختلاف.
- لعب الطفل مع الأب مختلف عن الام ، الأم لعبها حنين ، و الأب فيه قوة شوية ، وده في مصلحة الطفل لانه بيتعلم إنه يفكر في ردود فعل جديدة للأفعال الجديدة.
- على الأمهات إنها تسيب الاب يجرب حجات للطفل بدون نقد ، وتتقبل ان الاب مش هيغير الحفاض مثلا بطريقة ممتازة زيها، لكن تتقبل انه هيتحسن مع الوقت وماتنتقدهوش.
- جروبات دعم الأمهات و كتب التربية حاجة مهمة طول رحلتك مع التربية لتعلم حجات جديدة.
- القراءة من الحمل عن الرضاعة وغير الحفاض و نوم الطفل ، هتساعدك كتير، وهتشيل من التوتر اللي بيكون موجود أول فترة في حياة الأم لأنها تكون عارفة حتى نظرياً هي بتعمل إيه.
- لما تحصل كارثة من الطفل أو عياط متواصل أو زن، غمضي عنيكي و أفتكري وجه ابنك وهو نايم ، افتكري لو الحاجة الغط اللي عملها دي كانت أذته بشكل كبير، هتلاقي الحب سيطر عليكي و بتتعاملي في الموقف بحب و حكمة أكتر.
- لما تحصل كارثة من الطفل أو عياط متواصل أو زن، غمضي عنيكي و أفتكري وجه ابنك وهو نايم ، افتكري لو الحاجة الغط اللي عملها دي كانت أذته بشكل كبير، هتلاقي الحب سيطر عليكي و بتتعاملي في الموقف بحب و حكمة أكتر.
الام فعلا لو عرفت سبب بكاء الطفل او زنه بدور على الحل باقل جهد من العصبيه
ردحذفممتااز .. منتظره ياقي الكتاب
جميل جدا تلخيصك ..جزاكي الله خيرا ❤
ردحذف