نشاط المطابقة
من الأنشطة الممتعة للطفل، بتسمحله يلعب بالمجسمات والكروت ويكتشف صور جديدة، ويتعلم كلمات جديدة وفي نفس الوقت بيطور من قوة ملاحظته وذاكرته وتركيزه.
بيطبق مع الطفل حسب استعداده..
بالنسبة لي بدأت بتطبيق نشاط مطابقة صورة بمجسم من سنة واتقنته بنتي عند 18 شهر، وبيطبق بالطريقة دي:
بتجيبي صينية الكروت والمجسمات، و برص الكروت على الأرض، وبقول اسمهم وأنا برصهم، وبعدين بطلع مجسم وأقول اسمه، وبعدين بلف بايدي وأنا ماسكة المجسم على الكروت وأقول اسمهم تاني لغاية ما أوصل للكرت اللي بيطابق المجسم وأحطه عليه.
طبعا ده بيحصل أول مرة، وبعدين بدي للطفل الحرية في اللعب بالكروت والمجسمات، ومابصححش للطفل، بسيبه يتكشف بنفسه إيه بيطابق إيه.
ممكن بعد فترة من التدريب تمسكي كارت تسألي الطفل فين القطة؟ وهو هيجيب المجسم.
من 18 شهر بدأت تطبيق مطابقة كارت بكارت ، وأتقنته عند حوالي 24 شهر.
فالأول بدأت ب 3 كروت بس، وكنا بنقول اسمهم ، وبحط كل كارتين متشابهين على بعض، وبعدين بسيب للطفل حرية اللعب بالكروت يا إما يقول كل اسم لوحده، يا إما يطابق، وبعد فترة بنزود عدد الكروت.
قبل 3 سنين مش لازم الدرس يتعمل بطريقة صحيحة تماماً ، ولا يكمل للآخر، لأن ممكن الطفل مايكونش عنده صبر في الفترة دي إنه يشوف انتي بتعملي ايه، هو بيكون عايز يعمل بنفسه فهتلاقيه أخد الكروت ولعب بيها بطريقته ، عادي سيبيه يلعب براحته، الهدف هو لفت انتباهه للنشاط وإنه يشارك فيه بأي طريقة يحبها في الأول.
في مونتيسوري بنقدم الصور للطفل طبيعية " متصورة" مش مرسومة أو ملونة بألوان غير ألوانها الحقيقية + تكون الصورة كاملة مش مقطوعة زي مثلا رأس الحيوان بس، وده عشان نساعد الطفل يتعرف على الحجات لما يشوفها في الطبيعة، ومايتلخبطش مثلا لما يشوف قطة لونها أحمر لأن دي صورة غير حقيقة، والخيال في مونتيسوري بيتقدم بعد 6 سنين، لأن الطفل محتاج يعرف الحقائق الأول وبعدين الخيال.
في الأول كنت بحب أشتري كروت لإنها أسهل بس بعد كدا قررت هأصمم الكروت لأن التصميم بيسمحلى أضيف اللي عايزاه بالظبط، فدي أول مجموعة صممتها.
كل اللي هتحتاجيه هو طابعة و ماكينة لتغليف الكروت، وممكن تعمليهم في أي مكتبة لو مش متوفرين في البيت.
لطباعة الكروت :
حيوانات
فواكه
خضروات
أشكال
ليست هناك تعليقات:
إرسال تعليق