ما هي المدونة؟
المدونة هي موقع على الإنترنت، غالباً شخصي، بيكتب عليه فرد يومياته أو تجاربه أو أعماله الإبداعية أو نشاطاته المختلفة.
ليه أعمل مدونة؟
لو بتحب تشارك الناس الخبرات، لوالكتابة من هواياتك، لو بتحب تكتب حجات وترجعلها بعد فترة، وأسباب كتير تانية.
فين أعمل مدونة؟
في مواقع كتير بتقدم خدمة عمل المدونة مجاناً ، لكن بشرط اسم الموقع هيكون مع اسم موقعك طول ما هي مجاناً
مثال:
مدونتي
simplyeman.blogspot.com
simplyeman ده اسم المدونة
blogspot ده اسم الموقع اللي عملت من عليه المدونة وهو تابع لجوجل.
في مواقع تانية زي Wordpress و غيره كتير، بس دول أشهر اتنين، وغالباً محتاج تحدد في الأول هتعمل على أي واحد منهم، كل واحد له مميزات وعيوب ، ممكن تعمل بحث بسيط على جوجل هتلاقي الفروقات بسيطة.
أنا اخترت إني أعمل على جوجل، وهأوضحلكم النهاردة إزاي نعمل مدونة على جوجل.
أول خطوة: لازم يكون عندي E-mail إيميل ( بريد إليكتروني) على جوجل ، مش هأشرح الخطوات بالتفصيل لعمل إيميل ، بس لو حابيين اكتبوا لي تعليق وهأعملكم موضوع تاني.
ثاني خطوة: هندخل على موقع Blogger.com ، وهنضغط على
Create your blog يعني أنشأ مدونتك.
ثالث خطوة: هيوصلك لصفحة، محتاج فيها بريدك الإليكتروني وكلمة السر:
رابع خطوة: هيطلب منك تكت اسم المدونة وعنوانها على النت URL
المثال هنا أنا كتبت مدونة الحياة الصحية، وجبت اكتب عنوانها
healthylifeblog.blogspot.com
فقالي إنه ماينفعش لأن في بالفعل مدونة بالإسم ده قبل كدا، فبفضل اغير الأسم لغاية ما بدل علامة التعجب الصفرا على الجنب تبقى علامة صح زرقا زي الصورة اللي بعد دي:
بعد ما نختار اسم المدونة، ويتقبل، نختار حاجة اسمها ال Theme اللي هو شكل المدونة من الأشكال اللي قدامنا دي :
بعد كدا هيسألك لو عايز تعمل اسم مدونتك بدون اسم موقعنا يعني بدل من healthylifeblog.blogspot.com
يبقى healthylifeblog.com
ده طبعا لو عايز تعمله بيكون بفلوس ، حوالي $100 في السنة، لو انت تحب تعمل كدا ، اعمله، لو حابب تكمل مجانا هتقول No, thanks.
هيوصلك لصفحة التحكم في المدونة اللي من خلالها تقدر تضيف مواضيع جديدة، او تقدر تشوف إحصائيات المدونة زي كام حد زار مدونتك، أو تعدل تصميم المدونة.
هنبدأ دلوقتي نكتب أول موضوع على المدونة New post
هنكتب عنوان التدوينة زي الصورة، و نكتب الكلام اللي عايزين نكتبه ، ونختار Label من على اليمين، ده معناه إن القسم اللي عايز أحط فيه الموضوع مثلا لو هاكتب عن الصحة وعن البيت فكل موضوع اكتبه أحطه في label الصحة او التعليم، ده اختياري لكن بيساعد إن المدونة تبقى منظمة.
بعد ما اخلص كتابة الموضوع يا اعمل save معناها إنه يتحفظ عندي، أقدر أرجعله أعدله أو أضيفله أو أمسح منه حاجة.
أو أعمل Publish وكدا هيتنشر اي حد يقدر يشوفه.
أول ما اعمل Publish هأرجع تاني لصفحة إدارة المدونة، وهألاقي الموضوع اللي كتبته هنا وبيوضح كام واحد شافه ، وهل اتكتب عليه تعليقات ولا لأ.
ولو ضغطت على view blog هيوصلني للمدونة زي ما الناس بتشوفها.
دي هتبقى المدونة ، ولو حبيت أكتب موضوع جديد هاضغط على New Post ولو حبيت أشوف كل المواضيع هأضغط على Design اللي جنبها.
أتمنى تكونوا استفدتوا ولو حابيين تشوفوا مواضيع أكتر عن التدويين سيبوا تعليق هنا.
السلام عليكم، شكرًا ياعسل علي المعلومات القيمه😘
ردحذف