في البداية لازم نتفق على التعريف اللي قولناه في أول جزء، التهذيب هو تعليم، مش عقاب ولا توبيخ ولا تأنيب ولا أي حاجة ، تعليم بس، وفي كل مرة تقوم علشان تهذب الطفل لازم تفتكر إنه قايم تعلمه، تعلمه فقط.
-1-
انتظر حتى يكون الطفل مستعد
اتكلمنا في الجزء السابق عن مرحلة إعادة التوجيه مع طفل، المرحلة اللي بتعلم الطفل فيها حاجة جديدة و ده بيحصل بعد التواصل مع الطفل و التعاطف معاه و التأكد من إيه حاسس بيه وإيه المشكلة.
خطوة إعادة التوجيه دي مهمة لأنها اللي بيحصل فيها الروابط الشبكية في مخ الطفل، فلازم نتأكد إننا مستعدين وإن الطفل مستعد ليها، إزاي؟ لازم إحنا نكون فعلاً هاديين، مش متعصبين ( فماتقولش للطفل أمر أو توجيه وأنت متعصب ) و لازم الطفل يكون مستعد للتعلم، يكون هادي و سامعك كويس ، مايكونش متوتر ولا خايف ولا جسمه مشدود ولا مستعجل ، فخطوة إعادة التوجيه ممكن تتم وقت الحدث و ممكن تتم بعدها في آخر اليوم، أو في اليوم اللي بعده، على حسب عمر الطفل ، و الموقف، أنت تقرر ابني مستعد للتعلم دلوقتي، ولا بس دلوقتي اتواصل معاه و اهديه ونفتح الموضوع وقت تاني .
كمان إعادة التوجيه مش شرط يكون نصائح وأوامر، ممكن إعطاء للطفل فرصة تانية، زي لو قال كلام جارح لحد، ممكن تقوله إنه كلامه ده مؤذي، هل ممكن تفكر في جملة تانية تكون أفضل؟ ، لو حط لبسه بعد ما غيره على السرير، ممكن تسأله هل في مكان أحسن نحط فيه لبسنا علشان لما نيجي ننام بليل يكون السرير فاضي؟
-2-
كن ثابت مش متزمت
من أكبر الهدايا اللي بتقدمها لابنك إنك تكون ثابت، بداية من الروتين الثابت لمواعيد نوم الطفل، إلى الثبات في الحجات اللي بتسمح بيها و الحجات اللي بتمنعها، ماتخليش عياط الطفل أو غضبه يأثر عليك.
لكن مع محاولة الثبات ، ممكن يتحول الوالد لمتزمت.
مثال: كل يوم الطفل متعود يعمل الواجب قبل العشا، وفي يوم أجداده فاجئوكم بزيارة و هو عايز يقعد معاهم ، إيه الحل؟
المربي المتزمت، هيخلي الطفل يقعد ويعمل الواجب في أوضته ويقعد هو مع الأجداد لأن ده النظام.
المربي الثابت هيقول للطفل أنت عارف إننا بنعمل الواجب في الوقت ده، لكن علشان أجدادك هنا وأنت حابب تقعد معاهم، النهاردة استثناء ، هأتعمل الواجب بعد العشا.
فوضعنا لقواعد للطفل، مش معناها إننا مانعمل استثناءات محدودة، لكن ننتبه في أمور مافيش فيها استثناءات اللي ليها علاقة بسلامته الجسدية مثلاً ، وننتبه من تكرار الإستثناءات كتير لغاية ماتبقى قواعد.
----------------------------------------------
ليه بنهذب ولادنا بطريقة التهذيب بدون دراما؟
ذكاء + تعاطف + تكامل
-1-
ذكاء
بالطريقة دي أنت بتخلي الطفل يفكر بنفسه إيه اللي ممكن يعمله، بيعمل روابط عقلية جديدة في مخه، بيفهم مشاعره ونفسه أكتر، بيفكر في اللي حواليه أكتر، بتبني ثقته في نفسه وقدراته، بتوفره فرص للإبداع.
-2-
تعاطف
التعاطف و الإحساس بالآخر جزء مهم جدا من الشخصية، وافتقاده مش بس بيؤدي لمشاكل في الطفولة زي إن طفل يضرب الأطفال التانية أو يتنمر على الأطفال، لكن في الحياه كلها، أفعال زي السرقة والجرائم بتتم بسبب عدم وجود تعاطف، إن الإنسان بيفكر في نفسه بس مش حد تاني.
مثال : قول لطفلك : شوفت إزاي وش أخوك كان حزين لما انت صرخت له؟ أكيد كان صعب عليه ؟
مثال: شوفت دموع صاحبك أحمد؟ تفتكر هو حاسس بإيه دلوقتي ؟
- شايفين طريقة التساؤل اللي بتخلى عقل الطفل يفكر ويتعاطف بدل من طريقة الخطب والتهديد واللوم -
-3-
التكامل و إصلاح العلاقات
بعد ما بنسأل الطفل عن المشاعر ونساعده على توضيح الموقف، بتستخدم تاني أسلوب التساؤل لحل المشكلة، بنسأله أنت شايف إيه ممكن نعمله؟ ممكن تطلب منه تاني بطريقة أفضل؟ هل تعرف إزاي ممكن نصلح ده ؟
بنساعد الطفل على الإعتذار ، وممكن أوقات نعتذر مكانه لو هو مش مستعد علشان نوريله إنه شئ كويس لما نعمله.
____________________
استراتيجيات عامة تساعدك على تطبيق التهذيب بدون دراما:
- قلل الكلمات قدر المستطاع.
- ركز على المشاعر
- أوصف المواقف والمشاعر
- اسأل طفلك
- غير كلمة "لأ"، ل كلمة " آه" بس + وضع مختلف
( مثال: اه هنقرا قصة كمان بس بكرة عشان وقت النوم دلوقتي) "
- ركز على الإيجابيات في طفلك وشجعه على الإستمرار فيها.
- دور على طريقة مبتكرة لحل المشاكل
- ركز على تعليم الطفل التعاطف والتساؤل.
هل لو استعملت طريقة التهذيب بدون دراما مع طفل عنده 8 سنين هيسافر ولا فات الأوان
ردحذفمتى أبدأ مع إبني طريقة التهذيب بدون دراما هو عمرو شهرين ونص
ردحذف