تجربتي في الطلب من موقع شي إن shein.com ( ب 4$ التيشيرت )

النهاردة هأوريكم اشتريت إيه من موقع شي ان و هأقولكم رأيي في اللي اشتريته والموقع عامة. 

لمشاهدة تجاربي السابقة في الشراء أون لاين من هنا : 

aliexpress sammydress , فستان الزفاف من tidebuy 

شي إن ده موقع صيني، مشهور إنه بينزل حجات كتير على الموضة وبأسعار قليلة، وبيشحن لأي مكان في العالم ( سعر الشحن بيختلف حسب المكان والمنتجات ) ، لكن في أيام في السنة بيعمل الشحن مجاناً  على أي منتج.

ده رابط الموقع 

دي كانت أول تجربة ليا، لما لقيت الأسعار بتبدأ من $4 ، فقررت أجرب  4 تي شيرتات للصيف.

ده كان الأوردر كله 

التي شيرتات من 5$ ل8$ ، والشحن $4 ، واستخدمت كود WING3 قلل سعر التي شيرتات ل 4$ ل 7$

ده تتبع الطلب من الموقع، أنا طلبت يوم 9 يوليو، ووصل يوم 16 يوليو ، يعني أخد 7 أيام بس، ده يعتبر سريع لانه بيوصل من الصين.

في البداية لازم اللي أول مرة يطلب ، مايعتمدش على مقاس لارج، أو ميديوم، لازم يقيس مقاساته بالظبط بالمقياس اللي بيقيس بيه الخياطين الجسم ( موجود في دولار تري أو ولمارت في أمريكا ، وفي أي محل خروات في مصر ) اللي زي ده:

الطريقة زي الصورة دي، بتلفي المقياس على الصدر والوسط والفخد ، وأنتي لابسة برا بس، بدون هدوم. وتدخلي على الموقع تختاري المقاس المناسب بناء على القياسات دي.

يالا نتفرج على التي شيرتات :

ده عجبني في البداية علشان الكم في حاجة مختلفة، وبحب المخطط، بينفع ألبسه تحت جاكيت أو تحت كارديجان، كنت قلقانة من الطول ، لكن طولة مناسب ومظبوط، وقماشته كويسة جداً 95% رايون وده بيكون طري وخفيف غير البوليستر.

المشكلة هنا إني كبرت في المقاسات، على أساس إني بطلب من موقع صيني، وتجاربي السابقة مع الصينين إن مقاستهم أصغر من المكتوب، لكن الموقع ده مقاساته مظبوطة بالظبط ، فطلع كبير شوية عليا.

ده ب 6$ ويستاهل.

الرابط على الموقع 

 أكتر واحد مظبوط على مقاسي، و طوله كويس  - أنا 170 سم :D  فموضوع الطول ده مهم بالنسبة لي - ده عجبني المقاس، لكن من الكم الشمال زي ما واضح في الصورة فيه مشكلة في الخياطة بسيطة، في خيط زيادة عايز يتقص، على الموقع كان مكتوب إنه 95% قطن، لكن للأسف ماعتقدش إنه قطن، تقريباُ كله بوليستر.

ده ب 4$

الرابط من الموقع

ده مش عارفة أقرر عاجبني ولا لأ، قولولي أنتو في التعليقات، أنا كان عجبني فكرة الكرانيش اللي تحت دي، حسبتها كيوت وجديدة، لكن لما وصل، حسيت إنها كتير، فموسعة التي شيرت أوي من تحت ، وهو مظبوط من الصدر، فحاسة شكله بقى غريب، ، بس اللي عاجبني إنه 100% قطن وقماشته كويسة جداً.

ده ب $8 

الرابط من الموقع

 ده أكتر واحد عاجبني، هو 95% رايون، فقماشته طرية جداً، واتحمست ألبسه أول واحد، لابساه دلوقتي وأنا بكتب التدوينة :D 

بس زي ما حصل من أول تي شيرت، مقاسه أكبر شوية من مقاسي، بس دي ميزة بردو ممكن ألبسه على ليجن مش بس جينز، لونه الحقيقي زي صورة الموقع بس الإضاءة مغمقاه في صورتي. 

ده ب $6 و يستاهل 

الرابط من الموقع

و بكدا تكون خلصت تجربتي مع الموقع، وعامة تقيمي للموقع:

المنتجات:

متنوعة كتير، ومناسبة لكل الأذواق.

الخامات:

في خامات كويسة ( أغلبه بوليستر  وأنا مش بحب البوليستر، لكن في حجات فيها قطن ورايون زي اللي اشتريتهم دول ) ،

الأسعار : 

مناسبة ، ورخيص مقارنة بالمحلات أو المواقع التانية.

خدمة العملاء:

كويسة جداً، وعندهم خدمة 24 ساعة شات على الموقع.

عامة عجبني وممكن أجربه تاني لكن هاتأكد إن المقاسات تكون مظبوطة لأن مقاساتهم مظبوطة ، زي المكتوب بالظبط.

أتمني يكون فادكم الموضوع 

 وفي التعليقات قولولي لو حابين أجرب مواقع تانية 

لمشاهدة تجاربي السابقة في الشراء أون لاين من هنا : 

aliexpress sammydress , فستان الزفاف من tidebuy