تعليم الحمام للطفل بطريقة مونتيسوري Montessori Toilet learning

من أكتر الحجات اللي الأمهات خوفوني منها هي تعليم الطفل الحمام، سواء بكلام مباشر من الأصدقاء، أو بطريقة غير مباشرة زي كل الشكاوي اللي على جروبات الأمهات على الفيس بوك.

وعلى عكس كل ده، تعليم بنتي الحمام كان من أسهل التجارب اللي مرينا بيها مع بعض، علشان كدا حبيت أكتبلكم علشان أشارككم كل الأسرار و الخطوات اللي هتخلي تعليم الحمام تجربة ألطف كتير للأمهات، وزيها زي تعليم الأكل بالمعلقة، أو سكب الماء، أو أي مهارة تانية الطفل بيتعلمها.

الخطوات تبان كتير، لكنها مريحة جداً، إنك تعملى الحجات بالراحة على فترات طويلة أحسن من الضغط على فترة قصيرة وتعب نفسيتك ونفسية الطفل. 

والطريقة دي بتخليكي أنتي وطفلك فريق هدفكم واحد، بدل من الطرق التانية اللي بتخليكي مقابل ومواجهة لطفلك، واللي بتولد العند والعصبية. 

يالا نبدأ .. 

علاقتك مع طفلك هي 75% من تعليم الحمام

الحقيقة عدم نجاح تعليم الحمام ف حالات كتير هو بسبب إن العلاقة بين الطفل والأم في الأصل غير سليمة، يعني إيه علاقة سليمة؟ يعني ببساطة الأم بتحب الطفل وبتظهر حبها للطفل دايماً وهو مشبع عاطفياً من الحب والحضن والوقت اللي بتقضوه مع بعض، علاقة سليمة يعني الطفل مش بيتضرب ولا بيتزعقله ولا بيروح النوتي كونر، يعني في وسائل تانية للتهذيب ( اتكلمنا عنها هنا  و هنا )، علاقة سليمة يعني الأم فاهمة الطفل، فاهمة امتى بيجوع، امتى بيحتاج يخرج، امتي بيحتاج حضن، امتى بيحتاج ينام ، امتى بيحتاج تشجيع. علاقة سليمة يعني الأم واثقة في الطفل وقدراته ومستعدة تصبر علشان يتعلم مهارات جديدة. 

و العلاقة دي بتبدأ من لحظة الميلاد، مش من بدء قرار تعليم الحمام.

ما لا تعرفه عن مونتيسوري

تعليم الحمام مش تدريب النونية (البوتي تريننج)! 

الفرق بين الأتنين مش مجرد المصطلح، في فلسفة ورا التعريف، ببساطة 

 - تعليم الحمام عملية طويلة المدي، بتبدأ من الميلاد، وبتاخد وقت وصبر ومجهود ووعي، على عكس التدريب اللي بيركز على تعلم مهارة واحدة في وقت محدد بصرف النظر عن قدرات الشخص أو استعداده.

- في التدريب، الأم بتستنى الطفل يبدأ يدرك لوحده علشان تبدأ ، لكن في التعليم، الأم هي اللي بتبدأ بتقديم الوعي للطفل والأدوات اللي هتساعده يتعلم أسرع.

- في التعليم ، الطفل هيكون مستعد للتعلم و عنده حافز ذاتي للتعلم، على عكس التدريب اللي الأمهات بتلجأ فيه لوسائل تحفيز خارجية وغالباً بتكون غير متناسبة مع العملية كلها.

تعليم الحمام يبدأ من لحظة الولادة

عملية التعليم بتبدأ من الإدراك والوعي، إدراك الإنسان إنه محتاج يتعلم الحاجة دي، بالذات، و دلوقتي. 

في تعليم الحمام دورنا كأمهات إننا نزود الوعي ده عند الطفل عن طريق:

1- الحفاضات القماش : ميزتها إنها بتحسس الطفل بالبلل وعدم الراحة لأنها مش بتمتص زي الحفاضات اللي بتترمي، فده بيسرع التعلم ( شخصياً ماقدرش استخدمها لأن ماعنديش غسالة في البيت، لكن اللي يقدر يستخدمها يجرب) 

2- اشتري النونية قبل ما تولدي : ده الفرق اللي قولناه بين التعليم والتدريب ، إننا بنبدأ من بدري، من الحجات اللي عملتها شخصياً اشتريت النونية من بدري جداً وحطيتها جنب لعب بنتي، من 3 لـ6 شهور كانت بتخاف منها ومابتقربلهاش، من 6لـ12 شهر كانت بتلعب بيها وتقلبها وتحط عليها حجات، من 12 شهر بدأت تقعد وعملت أول مرة فيها، ودخلت النونية الحمام.

تأكدي إن النونية مش عالية على الطفل، يعني "بيقرفص" وهو قاعد لأن ده بيسهل عملية الإخراج، ( جربي بنفسك تحطي كرسي صغير تحت رجلك وأنتي بتعملي حمام، هتتفاجئي) .

3- ابدأي كل يوم تدخلي النونية للروتين : بعد ما الطفل يتعود على شكل النونية ويحبها ويقعد عليها بدون أي خوف، ابدأي دخلي النونية في الروتين عن طريق إنك كل يوم الصبح وإنتي بتغيري الحفاض للطفل، قعديه على النونية ثواني لغاية ما تجيبي الحفاض الجديد مثلاً، هيبدأ يعمل مرة ، مرة لأ ، عادي جداً ، مانضغطش أبداً ولا نتضايق، لكن نشجع الطفل وهنتكلم بالتفصيل دلوقتي عن التشجيع إزاي بيحصل.( بدأت ده من حوالي 14 شهر، وطبعاً ده بيختلف من طفل للتاني )

4- خدي بنتك الحمام معاكي: الطفل محتاج يشوف ماما بتعمل في الحمام علشان يبدأ يستوعب إن ده المكان اللي بنعمل فيه حمام، واتكلمي معاه إحنا بنعمل ببي في الحمام، و من رأيي إن مافيش خصوصية في السن ده، ممكن نبدأ من سنتين الطفل يتعلم إن الباب بيتقفل، لكن الوقت ده مهم للطفل يشوف قدامه نموذج يتعلم منه.

5- اقرأي كتب عن الحمام علشان تبدأ تشوف قدامها طفل زيها بيعمل إزاي هتحب تقلده

6- سمي الأشياء بمسماياتها : اتكلمنا قبل كدا عن أهمية الكلام مع الطفل بلغة سليمة في كل الحياه مش بس في تعليم الحمام، لان ده بيأثر على لغة الطفل و تطوره، وخلال عملية الإخراج لازم نفهم الطفل إنه يستخدم كلمات سليمة زي التبول والتبرز ، أو pee & poop  ، الفرج و المؤخرة. 

لو الطفل متأخر في الكلام ، او لسه ماتكلمش، ممكن تتواصلي معاه بالإشارة زي كدا

7- اعملي أنشطة مع طفلك : الأنشطة بتنمي مخ الطفل بسرعة، وبتخليه يستوعب اكتر فكرة المحاولة والفشل و إعادة المحاولة، وكل ما الطفل اتعرض لمؤثرات بصرية و سمعية ولمس حجات أكتر كل ما أستوعب تعليم الحمام وتعليم أي حاجة تانية أسرع، ممكن تشوفي الأنشطة المناسبة من هنا :

أنشطة مونتيسوري من عمر 0 ل 6 شهور

أنشطة مونتيسوري من عمر 6 ل 12 شهر 
أنشطة مونتيسوري من 12 ل 18 شهر
أنشطة مونتيسوري من 18 ل 24 شهر

مرحلة ما بعد الإدراك 

المرحلة دي بيكون الطفل أدرك فيها إنه بيخرج، وإن الفضلات بتضايقه لو فضلت على جسمه وقت طويل ( غالباً فوق 12 شهر)  فهنبدأ 

1- شجعي ما تديش بونبوني ، بنتي اتعلمت تعمل حمام من غير بونبوني ولا ستيكر  ده ممكن يحصل يا جماعة ، الفكرة دي طبعاً من أساسيات مونتيسوري، إن مافيش ثواب وعقاب ، لكن في تحفيز للطفل وتشجيع، إزاي ببساطة ده بيحصل، هأقولكم أمثلة :
- لما الطفل يعمل حمام في النونية، هنبتسم ونقول بنبرة صوت فيها سعادة : بسمة عملت حمام في النونية ، بسمة بقت كبيرة ، انا فخورة ببسمه، بسمة فخورة بنفسها علشان عملت حمام في النونية صح؟  وممكن تكون عايزة تبص على اللي عملته علشان نزود إدراكها، بنخليها تبص طبعاً. بنخليها تعمل السيفون بنفسها،  يعني ببساطة بنقول اللي الطفل عمله لكن بنبرة صوت فرحانة. وهتلاقي الطفل بقى فخور بنفسه وبقى بينبسط لوحده لما بيعمل حمام في المكان الصح.

أبداً ماتقعديش الطفل غصب عنه على النونية، ماتقوليش للطفل اعمل حمام عشان اديك حاجة حلوة، ماتعاقبيش الطفل على أي حوادث تحصل.

وده فرق تاني بين التعليم والتدريب، التعليم عملية متكاملة بننمي مهارات كتير فيها زي مهارة التحفيز الذاتي، وبناء ثقة النفس عند الطفل.

2- نجهز الحمام للطفل، اتكلمنا بالتفصيل عنه هنا ، لكن ببساطة نخليه مكان مرحب الطفل فيه، حجات على مقاسه زي النونية ، كرسي عند الحوض علشان يقدر يغسل إيده بنفسه. وقفل الدواليب علشان يكون مكان آمن لدخول الطفل وقت ما يحب. 

3- غيري للطفل وهو واقف، ممكن أحول لل Pull-ups بدل الحفاض لو بستخدم الحفاض اللي بيترمي، أو كيلوت بدل من الحفاض القماش خلال فترة النهار.

التغيير والطفل واقف ده حاجة مهمة تتعمل أول ما الطفل يبدأ يقف ، بتوصل للطفل إنه كبر مش زي البيبي اللي بيغير وهو نايم، وبتعود الطفل على طريقة تغيير الملابس الداخلية زي الكبار، وبتخلي وقت التغيير أسهل لان الطفل أول ما بيبدأ يمشي مابيرضاش أصلاً ينام علشات التغيير. ( الموضوع في الاول صعب وخاصة لو تغير براز مش بول ، لكن مع الوقت هتتعودي)

في أمهات بتوصل لمرحلة تقليه الطفل الملابس الداخلية تماماً علشان يدرك اكر لما يبدأ الإخراج، لو بيتك يسمح تشيلي كل السجاد و يكون الجو صيف، ممكن تعملي كدا، ده هيسرع عملية التعلم و الإدراك.

4- زودي زيارات الحمام بعد ما الطفل يبدأ يعمل مرة الصبح يومياً في النونية، نبدأ نزود التجربة مرتين ثم تلاتة .. وهكذا .. مش لازم كل مرة الطفل يعمل حمام، لكن بنجرب كل مرة نغير الحفاض، نقعد الطفل على النونية ، علشان يبدأ يربط ذهنياً بين الإخراج في النونية بدل من الحفاض، ولو لاحظتي الطفل بيعمل في فترات معينة، حاولى تقعديه في الفترات دي، وطبعاً بنقوله بطرق بسيطة و مشجعة، زي يالا بينا نقعد على النونية، إيه رأيك نقعد نقرا الكتاب ده على النونية، ممكن تيجي مع ماما الحمام؟ 

5- التعامل مع الحوادث 

طبعاُ هيحصل حوادث، وحتى بعد التعلم الكامل بيحصل، التعامل السليم معاها هو التعامل مع العواقب مش الطفل، يعني بهدوء هنقول ( بدون غضب ) : "أوبس بليت هدومك، إحنا بنعمل حمام في التواليت"، وناخد الطفل للحمام نغيرله ونقعده على التواليت او النونية علشان يكمل لو محتاج.

وفي الخروج في البداية ممكن عادي نقلع الطفل في البيت الحفاض، وبرا يلبسه ، و لو عندنا عربية، ناخد النونية معانا في الشنطة، وناخد معانا غيارات إضافية. 

ملحوظة أنا حاولت ماحطش الأعمار اللي بنتي اتعلمت فيها بالظبط علشان دي حاجة مهمة جداً غن كل أم تقارن طفلها بنفسه بس مش بأي حد تاني، تقارنه بنفسه يعني تشوف تطوره بقى فين ومستعد يعمل إيه، المقارنة محبطة للأم وللطفل، ومش فخر للأم إن ابنها يتعلم بدري أو إحباط إنه يتعلم متأخر، كل طفل وكل أسرة ظروفهم مختلفة.

دي كانت تجربتي في تعليم الحمام، شاركونا أي اقتراحات او أفكار أو تجارب قومتوا بيها ..

لو حابة أكتر تعرفي عن أنشطة مناسبة للاطفال في سن ابنك من هنا: 

عرضنا أنشطة مونتيسوري للأطفال هنا:

أنشطة مونتيسوري من عمر 0 ل 6 شهور

أنشطة مونتيسوري من عمر 6 ل 12 شهر 
أنشطة مونتيسوري من 12 ل 18 شهر
أنشطة مونتيسوري من 18 ل 24 شهر

وتكلمنا عن مبادئ وفلسفة مونتيسوري هنا:

ما لا تعرفه عن مونتيسوري