أنشطة مونتيسوري للأطفال من 18 لـ 24 شهر

مرحباً :) 

عرضنا أنشطة مونتيسوري للأطفال للأعمار الأصغر هنا:

أنشطة مونتيسوري من عمر 0 ل 6 شهور

أنشطة مونتيسوري من عمر 6 ل 12 شهر
أنشطة مونتيسوري من عمر 12 ل 18 شهر

وتكلمنا عن مبادئ وفلسفة مونتيسوري هنا:

ما لا تعرفه عن مونتيسوري

اليوم نعرض أنشطة مونتيسوري للأطفال من عمر 18 لـ 24 شهر:
لمعرفة كيف تقدمين الأنشطة لطفلك؟، ومتي سيتقن الطفل النشاط ؟ وهل النشاط مناسب لطفلي؟ اقرأي هذا الموضوع الهام من هنا

طبعا في أنشطة مستمرة معانا من الشهور السابقة فلازم مراجعة كل الشهور السابقة وتقييم طفلك فين ومحتاج يتعلم إيه عشان يكون جاهز للأنشطة الجديدة.

من المهم بدء تطبيق التهذيب الإيجابي مع الطفل ووضع القواعد، لخصت لكي كتاب التهذيب الإيجابي هنا 

أولاً أنشطة الحواس

نشاط إدخال الكروت في المحفظة 
إذا بدأ طفلك بالإهتمام بحقيبتك و إخراج كل محتوياتها وخاصة الكروت من المحفظة، فهذا وقت نشاط مكون من محفظة وكروت قديمة

البازل
من الأنشطة المحببة جداً للأطفال ، وبتحسسهم بإنجاز.
يتطور البازل في هذه المرحلة عن مرحلة من 12 ل 18 شهر
بزيادة عن قطع البازل من فقط 3 قطع لأكثر، وبمقبض أصغر.




وبعد إتقان البازل السابق، قدمت بازل بقطع بدون مقبض تماماً، و ده بيقدم للطفل فرصة جديدة لمسك قطعة البازل بطريقة مختلفة   ويوصلها لمكانها. 


استكمالاً لأنشطة الإدخال، قدمت نشاط الحلقات المختلفة في القطر 


و نشاط إدخال قطعتين مختلفين واحدة في عمود والتانية في عمودين، وده جزء من قطار كامل،  في قطعة تانية 3 أعمدة و 4 أعمدة، لكن بقدمه بالتدريج لغاية ما يتقن الطفل المستوى الأول ، أزود مستوى أصعب. 



نشاط سكب الماء من دورق لكوب، ده نشاط ممتع جداً للأطفال لأنهم بيحبوا يلعبوا بالميه، وهو درس من دروس مونتيسوري لسن أكبر، بتقعد المدرسة قدام الطفل وتمسك إيد الدورق بإيدها اليمين ، وبتثبت الكوباية بإيدها اليسار على الطاولة، وتحط الدورق على الكوب وتفضي الميه، وبعدين الطفل بيقلد المدرسة، في السن الصغير ده هنعمل كدا قدام الطفل وبعدين نسيبه براحته، ونضيف فوطة لمسح اي ميه تطلع برا الصينية. 



لعبة المتاهة
من الألعاب اللي ممكن الطفل يقضي وقت طويل فيها، وبتساعده على التركيز، وفهم المنطق والترتيب عنده، وتقوية عضلات إيده.

و مازال نشاط سلة الكنز مناسب لهذه المرحلة ولمعرفة المزيد عنه من هنا 

أنشطة الحياه العملية

في البداية لازم وضع نظام للطفل خلال اليوم، يصحى نفس الوقت وينام نفس الوقت، ويخرج لأماكن بصفة دورية، الروتين من أفضل الهدايا اللي بتقميها للطفل لأنه بيتزرع فيه من صغره حب النظام والصحوة بدري و الترتيب، والطفل اللي بينام كويس وبيرتاح بيكون تطوره وأدائه أفضل كتير.

نروح للأنشطة: 

اهتمت ابنتي بمسح الطاولات والأرض بعد سكب أي شئ عليها، لذا أعدت لها زجاجة بها منظف ( كوب ماء+ 1م صابون )، تدربت على الضغط عليها لإخراج الماء بالصابون والمسح بعدها بالمناديل.
اعتادت أيضاً على مسح الأرض بفوطة مخصصة فور سقوط أي شئ لأنها كانت تراني أفعل هذا.
تمسح أيضاً الشبابيك والزجاج بمنايل وزجاجة رشاش معبأة بخل ومياه.

من أنشطة العناية يالبيئة المحيطة المناسبة للسن ده : 

- تخصيص سلة للطفل لملابسه المتسخة و التدريب على نقل الملابس المتسخة فور خلعها إلى السلة.

- رمي الأوراق أو المناديل المتسخة في صندوق القمامة.

- حمل الأطباق من وإلى المطبخ إلى طاولة الطفل، مع تعليم الطفل بإمساك الأشياء بإيده الإتنين.

نشاط فتح وغلق السوستة
اهتمت ابنتي بمحاولة فتح كل السوست اللي بتشوفها، فعملت لها نشاط تتدرب فيه، ودلوقتي أتقنت الفتح والغلق.


اتكلمنا قبل كدا من 12 لـ 18 شهر عن بداية تعليم الحمام، الخطوات الجديدة الي عملناها الفترة دي: 
1- اشتريت كتاب عن الحمام، بيحكي إن بنت كبرت وبقت تحب تعمل كل حاجة بنفسها، لكن كانت لسه ماما بتغير لها، فحبت تتعلم تعمل حمام، وبنتي حبت الكتاب جداً وشجعها ، وكانت بتحب تقلد البنت وتروح على النونية.
2- بعد فترة، ابنتي رفضت النونية، واختارت تعمل حمام زي ماما في التويليت الكبير، فحضرت لها قاعدة صغيرة تناسب جسمها وكرسي تطلع عليه على التويليت بنفسها.
3- اشترينا  لبس داخلي "بانتي " زي الحفاضات بالظبط لكن بتتلبس من رجلها وهي واقفة، بدون ما تحتاج تنام، وكنت بغيرلها الحفاض و بمسح لها بعد الحمام وهي واقفة من سن 15 شهر.
4- بدأت تعمل البوب في الحمام، لكن البيبي في البانتي ماكنتش بتحس بيه.
5- بقينا نقعد من غير بانتي خالص في البيت، بدأت تحس بالبيبي، وتعمل في الحمام.
6- دلوقتي بتعمل البوب والبيبي في الحمام وإحنا في البيت ، ومابتلبسش بانتي وقت نوم الظهر وبتلبس بانتي برا البيت ووقت النوم بليل.
ومازلت مش مستعجلة، أنا متأكدة هي بتتعلم في الوقت المناسب ليها، وطريقة مونتيسوري التدريجية ناجحة معانا وفي تقدم بدون أي تعنيف أو استيكر أو كاندي أو مكافأت، بس لما بتعمل في الحمام، بضحك لها وبقول ياااي دانة عملت في الحمام، وهي بتقول كدا واتعلمت تستخدم السيفون وبتكون مبسوطة.


تعلمت ابنتي بالمواقف الحياتية بدون دروس، أن تلبس الحذاء، وتلبس الشورت، بتحاول في التي شيرت لكن لسه ماتعلمش بالكامل، فمن المهم نأكد على 3 حجات:
1- اختيار ملابس الطفل مش بناء على شكلها ولا أناقتها، لكن بطريقة تكون بسيطة و سهلة اللبس علشان الطفل يتعلم. 
2- ترك للطفل حرية التجربة، بنتي أوقات تفتح الدرج وتجيب لبسي أنا وتحاول تلبسه، بتحاول تلبس أحذيتي فبسيب لها الحرية في التجريب، كل محاولة بيعملها الأطفال بيتعلموا حاجة جديدة منها. 
3- عدم الإستعجال، سيبي وقت كافي قبل المشوار لأن طفلك ممكن يجي على باب البيت ويركز في محاولة وضع الحذاء، فسيبيه براحته يحاول، وقبل ما تدخلي اسأليه، تحب أساعدك؟

من أنشطة الحياة العملية : العناية بالنفس 

في السن ده مناسب:

-  إعطاء الطفل المناديل المببلة والتدريب على مسح نفسه بعد الحمام بيها.

- إعطاء للطفل فرشة الأسنان والتبادل معه بتفريش الأسنان، مرة الطفل ومرة الأم، وعمل أغنية لتفريش الأسنان تغنوها سوياً كل مرة. 

- مسح الأنف بعد العطس.

- غسل الطفل إيده بنفسه، بإشراف الأم، تقوم الأم بوضع الصابون على إيده وتعليمه إزاي يفرك الصابون بإيده، وبعدين يحطها تحت الميه، وبعدين ينشف إيده، ووضح منشفة في مستوى الطفل.

- مسح الأرض لو وقع أي ميه عليها، وتنظيف الأسطح وزجاج الشبابيك بالمناديل أو الفوط.

- حاجة مهمة جداً بتتصارع فيها الأمهات مع الطفل و هي إعطاء الدوا، الطريقة السليمة هي وضع الدوا في سرنجة، و إعطاء الطفل السرنجة عشان ياخد الدوا ومساعدة على تعلم قفل السرنجة عشان ينزل الدوا، بعد فترة هيتعلم يعمل كدا بنفسه، وهياخد الدوا بدون أي دراما، وماتنسيش تقوليله شكراً بعد ما ياخد الدوا.

من المهم بدء تطبيق التهذيب الإيجابي مع الطفل ووضع القواعد، لخصت لكي كتاب التهذيب الإيجابي هنا 

نشاط فتح وغلق الأبواب والأقفال

من الأنشطة الممتعة للطفل الفتح والغلق، دي لوحة الأقفال، في السن دي مش هيتقن الطفل كل الأقفال.

- أنشطة أخرى زي تعليم تقشير الموزة، وتفصيص البرتقال.

- زي ما بنهتم بعضلات الطفل الدقيقة و بنقدمله أنشطة يركبها بإيده، مهم نقدمله أنشطة لعضلاته الكبيرة للتدريب على على التسلق والنط والجري ، ده بيحصل برا في الحدائق واماكن لعب الأطفال، لكن لو في وقت شتا أو الخروج قليل للطفل، ممكن نجيبله زي الزحليقة دي في البيت، أو أي نشاط يخليه يتحرك.

ثالثاً الأنشطة اللغوية

تعلم الكلمات الأساسية

نشاط المطابقة من الأنشطة الممتعة للطفل لتعلم كلمات جديدة، وتطوير الذاكرة والملاحظة عند الطفل، لطباعة الصور ومعرفة اكتر عن النشاط من هنا

اهتمت ابنتي بالطبيعة جداً وكانت تشير للسما والقمر والنجوم وتقول اسمهم، فجبت لها كروت الطبيعة وتعلمنا كلمات جديدة منها.

و بسبب إهتمامها بالطبيعة كانت بتجمع ورق الشجر من الشارع، فعملتها صينية ورق الشجر بتضيف ليهم الجديدة، وبتقارن بين شكلهم وتلمسهم.

تعلم أسماء الحيوانات وأصواتها، بدأنا بحيوانات المزرعة من 12 ل 18 شهر، وكملنا حيوانات الغابة. 

لمعرفة أكثر عن إزاي نتطور اللغة مع الطفل من هنا

من أكثر الكتب المفضلة للأطفال، هي الكتب اللي فيها صور لأطفال حقيقية تانية، حبت بنتي الكتاب، وأنا حبيته أكتر، لإنها لما بتشوف صور الأطفال وهي بتاكل خضار وفاكهة بتطلب خضار وفاكهة :D  وطبعا اتعلمت أسماء خضار وفاكهة منه.

بدات بنتي بالإهتمام بالألوان 
عرفت لون واحد بس الأحمر، فبدأنا نقرا كتب عن الألوان

و تقديم سلة الكنز باللون الأحمر ، ولمعرفة المزيد عنه من هنا 

بدأت بنتي تفهم المشاعر، وحبيت أفهمها أكتر الفرق بينهم ، فجبنا كتاب المشاعر ده ، في طفلة سعيدة، وزعلانة، وغضبانة، ومتحمسة وفخورة. وامتى بحس كل إحساس من دول.

الطفل أول 3 سنين بيتعلم عن طريق الإحتكاك باللي حواليه والمواقف اليومية الحياتية ، مش عن طريق الدروس أو الأدوات المعقدة، بدأت ابنتي بتعلم الأرقام عن طريق إنها بتشوفني بلعب رياضة وبعد، بدأت تعد معايا، واتعلمت بعض الأرقام، وبدأنا نعد كل حاجة بنعملها، لما بنشتري فاكهة بنعدها، لما بنرتب المكعبات بنعدها.

بدأنا بتعليم لغة تانية " الإنجليزي" بطريقة التعلم عن طريق الغمر، والطريقة دي عبارة عن تعليم الطفل اللغة بالممارسة فقط بدون تدريس زي 

1- ترك الطفل بصفة دورية  وسط ناس بتتكلم اللغة التانية دي، زي حضانة مثلا فيها مدرسين أجانب.

2- التحدث مع الطفل برا البيت باللغة التانية وجوا البيت باللغة الاولى.

3- الأم تكلم الطفل باللغة الأولى والأب يكلم الطفل باللغة التانية طول الوقت في أي مكان.

4- تخصيص ساعة يومياً بالحديث مع الطفل والقراءة له باللغة التانية بدون أي كلام من اللغة الاولى. 

اتفقنا قبل كدا جملة " دي apple " دي ماتتقالش للطفل، لازم يتقاله جمل كاملة "This is an apple " لأن ده تعليم اللغة الصح، ولو طبقتي طريقة من الطرق اللي فوق دي الطفل هيكون عنده طلاقة في اللغة التانية زي الأولى بمرور الوقت. 

 - رأى شخصي و من تجربتي مع ابنتي - من المهم جداً خروج الطفل للطبيعة وقضاء أكبر وقت ممكن برا البيت، الطفل لازم يشوف أطفال تانية وناس تانية ، وأماكن جديدة ، إحنا في الأصل كنا عايشين في الشارع، بنقضي وقتنا في التعامل مع الناس والتفاعل مع البيئة ، دلوقتي البيئة المتحضرة والبيوت المقفولة والمواصلات بتمنعنا من كل ده، وبتؤدي لمشاكل نفسية كتير للكبار والأطفال أكتر زي الإكتئاب والإنطواء وعدم القدرة على التواصل. لو الأم في بلد مش بتعرف تخرج فيه أو مافيش أماكن لخروج الطفل و تفاعله مع اللي حواليه زي مكتبة أو حديقة عامة، أو زيارات دورية لأقارب وأصدقاء، الطفل هيحتاج يروح لحضانة -  مثلا ساعتين في اليوم - وحضانة يكون فيها جنينة و ألعاب وبتسمح للطفل بحرية اللعب مش التقييد ، أنا عارفة في دعوات كتير لإنتظار الطفل 3 سنوات ، ده صح لكن لو في بديل، إنما حبس الطفل وعدم تفاعله مع أطفال أو البيئة حواليه له تأثير سلبي. والقرار الأخير للأم هي الوحيدة تقدر تحكم على نفسية وتطور ابنها.

نلاحظ أن فلسفة مونتيسوري تقوم على أن كل طفل مختلف ومميز عن الآخر، وأننا نعلم الطفل ما يريد أن يتعلمه هو لا ما نريد نحن، لذا فالأنشطة هنا للإلهام وعلى الأم اختيار ما يناسب طفلها.

كما أن الطفل سيتقن الأشياء في الوقت المناسب له، فعلى الأم أن تستمر في تقديم الأنشطة وتعلم الطفل بخطوات بسيطة وأن تكون صبورة.

أيضاً كلما بدأنا بالأنشطة مبكرا كان استيعاب الطفل أكبر،فابدأي فورا أيا كان عمره و بالصبر و التكرار سترى ثمرة جهدك.

أيضاً ليست كل الأنشطة للطفل من بداية إتمامه 18 شهر، بعض الأنشطة هنا قدمتها لطفلتي مثلا وهي 20 شهر، فتعلمي أن تراقبي طفلك وقدمي المناسب له :)

إلى اللقاء مع أنشطة الأطفال من 24 ل 30 شهر :)

أنشطة مونتيسوري من عمر 0 ل 6 شهور

أنشطة مونتيسوري من عمر 6 ل 12 شهر
أنشطة مونتيسوري من عمر 12 ل 18 شهر

مبادئ وفلسفة مونتيسوري من هنا:

ما لا تعرفه عن مونتيسوري