أنشطة مونتيسوري للاطفال من سنتين ل 3 سنوات

مرحباً :) 

عرضنا أنشطة مونتيسوري للأطفال للأعمار الأصغر هنا:

أنشطة مونتيسوري من عمر 0 ل 6 شهور

أنشطة مونتيسوري من عمر 6 ل 12 شهر
أنشطة مونتيسوري من عمر 12 ل 18 شهر
أنشطة مونتيسوري من عمر 18 ل 24 شهر 

واتكلمنا عن مبادئ وفلسفة مونتيسوري هنا:

ما لا تعرفه عن مونتيسوري

اليوم نعرض أنشطة مونتيسوري للأطفال من عمر سنتين ل ثلاثة سنوات:
لمعرفة كيف تقدمين الأنشطة لطفلك؟، ومتي سيتقن الطفل النشاط ؟ وهل النشاط مناسب لطفلي؟ اقرأي هذا الموضوع الهام من هنا

طبعا في أنشطة مستمرة معانا من الشهور السابقة فلازم مراجعة كل الشهور السابقة وتقييم طفلك فين ومحتاج يتعلم إيه عشان يكون جاهز للأنشطة الجديدة.

من المهم بدء تطبيق التهذيب الإيجابي مع الطفل ووضع القواعد، لخصت لكي كتاب التهذيب الإيجابي هنا 

قبل الأنشطة أحب أوضح لكم إن في حجات أهم للطفل قبل الأنشطة،  فالمفروض تكون ترتيب أولوياتك كالآتي: 
1- علاقتك بطفلك ، تكوني فاهماه كويس، وعارفة تتعلمي معاه صح و إزاي توجهيه يكون إنسان عنده آداب وحسن تصرف و ده ممكن تعرفيه اكتر من هنا
2- الطفل بيقضي وقت برا البيت يومياً، أو على الأقل 3 مرات في الأسبوع، وبرا مش في المول ولا عند بيت جدته، لكن برا في الحديقة ، في الشارع، في مكان مالهوش سقف، بيشوف ناس تانية ، وأطفال في سنه، ده لوحده بيطور الطفل بدون تدخل منك. 
3- الأنشطة والألعاب اللي الطفل بيقضي وقته في البيت يشتغل فيها وينمي عضلاته وعقله ودي بس علشان الطفل مش هيقدر يقعد 24 ساعة برا، لو هيقعد في الشارع طول اليوم، هو هيكتسب نفس الحجات اللي بيتعلمها من الأنشطة.

أولاً أنشطة الحواس

فك وربط الصواميل ، لما تلاقي الطفل بدأ يحاول يفتح ويقفل الأزايز ، ممكن النشاط ده يتقدم له، ولو مش متوفر المسامير والصوامير، ممكن نستخدم زجاجات بأشكال وأحجات مختلفة، ده بيساعد في تقوية عضات الأيد، وإعدادها للكتابة بعد كدا.



ده نشاط تاني لإعداد الأيد للكتابة، نقل كرات القماش من علبة لعلبة تانية بإستخدام الملقاط


نشاط ثالث لتقوية عضلات الأصابع، هو المشابك، وهنا استخدمت المشابك الصغيرة الخاصة بالورق مش الغسيل لأن مشابك الغسيل كانت قوية على إيديها لسه.



 ده نشاط أساسي في فصول مونتيسوري، الأسطوانات ذات المقبض، وده بنقدمها للطفل الأول جزء واحد منها ، وبعدين بنضيف باقي الأجزاء، وده له أهداف مختلفة، زي تطوير عضلات الأيد، الربط بين المخ والأيد، و تجهيز الطفل لفهم الأحجام والأطوال و الأقطار و الأوزان المختلفة مستقبلاً في منهج الرياضيات.
ملحوظة: دي أسطوانات مصغرة للأداة الحقيقية مخصصة للتعليم في البيت، لكن في فصول مونتيسوري بتكون أكبر.



مستمرين في ألعاب الإدخال، وهنا اتطوت من قبل كدا، إن في من فتحة ل 4 فتحات ، وده بيكون تحدي جديد للطفل يقرر هيحط الأجزاء فين


و بنفس اللعبة ، استخدمناها لعمل نشاط التصنيف للألوان



وبنفس اللعبة تاني، استخدمناها مع رباط كوتشي( جديد) لعمل نشاط التددكيك ، أو الخياطة




الأنشطة الفنية من الأنشطة المهم تقديمها للطفل واللي بتساعد في تنمية حواسه وتذوقه الفني، فدايماَ يكون موجود ورق وألوان على رفوف الطفل لإستخدامها لما يحب، ننوع بين أنواع الألوان زي الميه والشمع و ممكن صنع ألوان منزلية بألوان الطعام.






و توفير للطفل أي خامات لعمل أعمال فنية بدون قيود.


من الحجات المهم الطفل يتعرض لها هي الموسيقى، الموسيقى أداة مهمة لتنمية الذوق و الإحساس وتطوير حاسة السمع عند الطفل، لو في إمكانية الطفل يحضر حفلة، أو حتى في البيت تشغلوا أغاني وتسمعوا سوا ( مش في الخليفة لكن بانتباه) ، لو تشغلوا أغاني وترقصوا عليها، لو الطفل عنده طبلة أو اكسلفون تعزفوا سوا.. 



المكعبات من الأنشطة اللي بتنمي الخيال و المنطق عند الطفل، وي أنواع كتير منها ، قدمي للطفل أي نوع متاح عندك.


البازل اتكلمنا عنده قبل كدا وأهميته، وإزاي بنتدرج فيه من قطعة واحدة لغاية ما بنوصل لبازل زي ده :

لمشاهدة مراحل البازل السابقة من هنا

 نشاط زي ده بيساعد على تقوية عضلات الأيد و تعلم المنطق و الربط و على التمهيد  لتعلم المجسمات ، اسمها وشكلها، زي الأسطوانة، المكعب ، الهرم ..


ده نشاط لتعلم الفتح والغلق بدأنا في المرحلة السابقة فتح وغلق علب ، وكمان تعلم الفرق ببين الأصغر والصغير والكبير والأكبر. ده عبارة عن علبة على شكل بنت ، كل ما تفتح العلبة الأكبر تلاقي علبة أصغر وهكذا .. 


زي ما اهتمينا بالعضلات الدقيقة في الأيد، لازم نهتم بالعضلات الكبيرة زي الرجل والظهر و ده عن طريق أنشطة زي دي:
اللعب بالكرة


اللعب بالأسكوتر ( مع مراعاة لبس خوذة  لسلامة الدماغ لو وقع )


اللعب بالعجلة ( بخوذة)


بدء ممارسة رياضة بإنتظام زي اليوجا أو السباحة أو الجمباز أو الباليه ( وده لما يكون الطفل مستعد ممكن من 3 سنين أو أقل بشهور بسيطة، مش من بداية السنتين) 
وعلى يوتيوب في فيديوهات كتير للأمهات لممارسة الرياضات مع الطفل في البيت لو مافيش إمكانية إن الطفل يروح لحد متخصص.



و زي ما قولتلكم في البداية، الوقت برا البيت ده اهم وقت في حياة الطفل ، لازم أسيبه يلعب بحرية ( طالما في مكان آمن ) ويتعلم مهارات جديدة



وأسيبه يمسك أي حاجة ، ماجريش أقوله أخيه وسيب 


آخر حاجة ألعاب التخيل والتمثيل دي مهمة جداً للطفل، والمفروض لما الطفل يجي يحكيلي حاجة خيالية، أتكلم معاه مش أكذبه، مثلا بيقولي الدمية بتاعته خايفة أوعايزة تاكل، فأرد أقوله خايفة من إيه ؟ عايزة تاكل إيه؟ و نقعد نعمل حوار لأن من حلاله هتفهمي طفلك أكتر.
ألعاب الخيال زي الدمي : 
وبسمح للطفل لو عايز يحميها أو يغسلها سنانها أو ينيمها ..

أو بيت زي ده 

 ألعاب التخيل و المحاكاه زي أدوات المطبخ ، لو ممكن نعمل للطفل مطبخ صغير، أو نعمله دولاب صغير لتخزين أطباقه، أو لو في مكان لعب أطفال برا البيت فيه مطبخ ، زي الصورة دي من مكان لعب للأطفال مش في البيت:



ألعاب التخيل مش محتاجة أي إمكانيات، ممكن الطفل يستخدم تحت الترابيزة كأنها خيمة، أو يستخدم الدواليب والأدراج، أو ز الصورة يستخدم كراتين، أي حاجة متاحة للطفل في البيت هو هيستخدمها لوحده، بس دورك إنك ماتوقفيش اللعب حتى لو الأرض بقت زي الصورة دي كدا :D 



ثانياً أنشطة الحياة العملية

المطبخ من أكتر الأماكن اللي الطفل ممكن يقضي فيها وقته، وهيتعلم كتير جداً ، الطفل في السن ده ممكن يعمل حجات لا تتخيلها بس محتاج حاجة واحدة بس تسمحيله بكدا ..

أمثلة:
- عمل عصير ليمون
- تقليب عجين الكيك
- غسل طبقه باللوفة
-المساعدة في ترتيب غسالة الأطباق
- غسل الفاكهة قبل ما ياكلها
- يطلع وجبة التصبيرة من التلاجة ( فاكهة جاهزة للأكل مثلاُ )
- يعمل ساندويش 
- يقطع خضار
- يكنس الأرض
- يطلع الغسيل من غسالة الهدوم
و غيره كتير، هأسيكم مع بعض الصور من داحل المطبخ:





مهم نوفر للطفل مكان آمن في المطبخ وأدوات على مقاسه








ده كان نشاط ترتيب السرير بعد ما نصحي، بنتي نقلت السرير كله للصالة :D 
وحبيت أضيف الصورة دي بالذات علشان أقولكم، إن مش دايماُ بننجح في كل الأنشطة، ومش دايماُ النتيجة تكون زي ما أنا عايزة، لكن دي خطوة من خطوات التعلم، إننا نغلط، والأم لازم يكون عندها صبر ومسامحة في المواقف اللي زي دي ، ماتتوقعش إن الطفل هيقوم بنفس المهمة زي ما هي هتقوم بيها.




ده مثال لإننا بنغسل برا البيت، كل مرة بنتي هي اللي بتحط الفلوس في الغسالة، ودي مشاركتها في عملية الغسيل اللي بتكون سعيدة جداً بيها.



من أمثلة تعلم الإعتناء بالآخرين إهتمامها بالدمى بتاعتها، وبتحميهم وبتغسل سنانهم، وبغني لهم علشان يناموا زي ما أنا بعمل معاها، وهي بتتعلم دروس مهمة لما بسمح لها بكدا.


من دروس الحياه العملية اللي المهم الطفل يشارك فيها هي الإهتمام بالمناسبات، فمثلا صديقتي أنجبت، ولما بروح أزورها بنتي بتتعلم إزاي نكون هاديين وإزاي مانلمسش المولود غير لما نسأل مامته، وإزاي الطفل مابياكلش غير اللبن، وإزاي حتى روحنا المحل و اشترينا هدية مناسبة له، ل دي دروس الطفل بيتعلمها من المعايشة و من الشرح أثناء الأحداث.





ده مثال تاني على أكتر اللحظات اللي الأم هي بقى اللي بتتعلم ظبط النفس و التحكم في الأعصاب :D
 وهي إن بنتي لونت بالفرشة على الحيطة، ووقتها بنتعلم درس تنظيف الحيطة، وعلشان تقدري تعدي المواقف دي ، اقري كتاب التهذيب الإيجابي من هنا


بنتي اتعلمت الحمام الفترة دي ، وهنا الطريقة كاملة لتعلم الحمام بمونتيسوري

ثالثاُ الأنشطة اللغوية

الكتب من أهم أهم أهم أدوات التربية، أنا لما بحب أعلم بنتي الحمام، بجيب كتاب عن الحمام، لما أحب بنتي تنام في سريرها بجيب لها كتاب عن طفل بينام في سريره، لما أكون هأخلف طفل، هاجيب كتاب عن ازاي الطفل بيعامل أخوه الصغير الرضيع، الكتب عالم خيالي للأطفال مبهر، والأشخاص في القصص هما أبطاله، أنا بقرا لبنتي كل يوم ، واشتركت تبع المكتبة العامة في تحدي قراءة 1000 كتاب قبل سن المدرسة ( 5 سنوات )

الكتب كتير مش هأقدر أصورها كلها لكن أمثلة: 

القراءة مش بس لإكتساب كلمات جديدة ، لكن التعود على القراءة بيبدأ من السن الصغير ده، ولو علمتي طفلك حب القراءة، فأنتي علمتيه كل شئ، لأن كل العلم والثقافة والأدب ف الكتب، والفرق الاول بين الشعوب المتحضرة والمتخلفة هو القراءة.

في مصر في مكتبات عامة وفي مراكز الشباب و في المراكز الثقافية كل دول بيقدموا استعارة كتب مجاناً، اكتشفوا اللي حواليكم وزوروهم.

من أدوات اكتساب اللغة بردو ، البازل :
ده لتعلم الألوان وأسمائها 

لما الطفل يكون مهتم بموضوع، أقدمله فرصة للتعلم اكتر، زي مثلا بنتي اهتمت بالعربيات، فبدل ما نقول على كل المركبات عربية، لكن بدأت تتعلم إن في جرار، في عربية زبالة ، في أتوبيس، في عربية مطافي، في عربية خلط أسمنت .. 

بردو بنتي بتحب الفراشات جداً ، فاستغليت ده في نشاط مطابقة وتعلم أسماء الفراشات و الألوان 

للطباعة من هنا

بكدا ، تكون أنشطة السن ده انتهت، أتمني تكونوا استفدتوا أفكار تطبقوها مع أولادكم ، ولو حابين أي أسئلة سيبوها في التعليقات 
وماتنسوش تشتركوا في صفحتنا على الفيس بوك 

آخر حاجتين   ..
-1-
أكتر تعليقين بسمعهم هما : 
1- أنا مش لاقيا حاجة أعملها مع ابني وزهقانين
2- أنا هأعمل كل الأنشطة دي إمتي؟ أنا فاضية؟ 
التعليقين دول عكس بعض لكن ليهم نفس الرد بالظبط، الوقت هو واحد لكل الناس ما حدش بيختار يومه يبقى30 ساعة أو 10 ساعات ، لكن كل واحد بيختار يعمل إيه في يومه، طبعاً مش كل يوم هنعمل كل الحجات دي، دي حجات اتعملت في سنة كاملة، و بردو مش لازم أصلاً نعمل نفس الحجات ، لأن كل طفل مختلف، ومتميز، ولازم يمر بتجارب مختلفة عن الآخرين علشان يكون متميز عنهم، إنما الفكرة من ورا عرض الأنشطة هي إعطاء فكرة لإزاي أستغل ميول طفلي في تطوير قدراته، وإزاي من حجات بسيطة أقدر أخلي حياتي و حياة طفلي أفضل.

وعايزة أقولكم ، أنا بفضل طول السنة مش مركزة بالورقة والقلم بعمل إيه، وبحس إن ممكن اعمل أكتر، لغاية ما بكتب التدوينة دي ، بقول إيه ده أنا عملت حجات أهو :D 

-2- 
الناس اللي بتقول الموضوع مكلف و ماقدرش اعمل كدا مع بنتي ، شوفوا الأنشطة اللغوية والحياة العملية مافيهاش أي تكلفة تماماً، وحتى كتير من أنشطة الحواس، الفكرة إن أي طفل في الدنيا أهله بيشتروا له لعب، أو بيجي له هدايا، فأنتو وانتو بتشتروا بدل الألعاب اللي ببطارية وعربيات تتكسر و ألعاب ملهاش قيمة، اشتروا ألعاب خشب ولها هدف زي الألعاب اللي ورتهالكم، وحتى الهدايا، لو الطفل عنده حفلة عيد ميلاد مثلاُ، خدوا الصور من هنا واطلبوا من أي حد هيشتري هدية يشتري حاجة زي دول لأن دول اللي محتاجينهم. 
عايزة أقولكم أنا تقريباُ مش شارية أي ألعاب من دي، كلهم إما هدايا طلبتها، أو أشتريتهم مستعملين من ناس ، أو مستلفاهم من صحابي لغاية ما بنتي تكبر عليهم وترجعهم.

أتمني يكون الموضوع  فادكم
أنشروه مع أصحابكم وقرايبكم