ليه بطلت استخدم بلاستيك ؟ و إيه البديل؟

البلاستيك المادة السحرية اللي بتتعمل أي شكل، أي لون، لأي استخدام، خفيفة و رخيصة ومابتتكسرش بسهولة ومؤخرا بتتحمل الحرارة كمان.

دي كل المميزات اللي علشانها بنستخدم البلاستيك، لكن هل فكرت هل في عيوب للبلاستيك؟ و إيه هي عيوب البلاستيك؟ 

للبلاستيك ضرر كبير على جسم الإنسان و على البيئة.

أولاً على جسم الإنسان: 

الإنسان جسمه في هرمونات ( مواد كيميائية) هي اللي بتتحكم في المخ و في المشاعر ، و في حتى شكل الجسم. 

الهرمونات مش بس هرمونات الذكورة والأنوثة، لكن في هرمونات بتأثر على السعادة والمزاج والتركيز و النمو. 

وللأسف أي هرمون بيزيد أو ينقص بيأثر على باقي الهرمونات. 

دلوقتي لو بصيت حواليك هتلاقي مشاكل الهرمونات بقت واضحة جداً في كل الناس تقريباً ، زي : سمنة غير مبررة و خاصة "الكرش "، شعر بيقع، حبوب في الوجه، عدم القدرة على الإنجاب، تعب وإرهاق طول اليوم. 

هل فكرت إيه ممكن يكون السبب؟ 
في أسباب كتير منها أكل اللحوم المليانة هرمونات، و استخدام البلاستيك، وحتى استنشاق ريحة بلاستيك محروق. 

البلاستيك بيأثر على هرمونات الجسم وبيلخبط عملها.
مشاكل هرمونات زي أمراض الرحم، قلة عدد الحيوانات المنوية، البلوغ المبكر، شعر زائد عند السيدات، و كبر الصدر عند الرجال.

البلاستيك بيأثر على نظام الغدد في الجسم و بيعطل عملها.

البلاستيك بيأثر على الإنسان باللمس ، وبيتضاعف تأثيره لما بيتسخن.
البلاستيك مرتبط بالإصابة بأمراض زي السرطان.
البلاستيك بيأثر على الأطفال و الرضع أكتر من تأثيره على الكبار، وجسمهم حساس لأي مواد كيميائية.
البلاستيك بيأثر على الإنسان لما بياكله، هل إحنا بناكل بلاستيك؟ اه شوف الكلام اللي جي :

جمعية الأطباء الأمريكين لطب الأطفال تنصح بعدم استخدام  البلاستيك و المواد الحافظة مع الأطفال

ثانياً: تأثيره على البيئة:

هل تعرف لما بترمي الزبالة بتروح فين؟
ببساطة الزبالة بتترمي في البحار والمحيطات، لأن الإنسان بأنانيته فكر طالما الإنسان بيعيش على الأرض، فمش مهم يعمل أي حاجة في المحيطات، وإيه النتيجة ؟
300 مليون طن بلاستيك بيترمي سنوياً في المحيطات والبحار، البلاستيك نتيجة تعرضه للشمس فترة طويلة في المحيطات، بيتكسر أجزاء صغيرة جداً بيتسمي مايكروبلاستيك، والسمك بقى ياكل بلاستيك لأنه مابيقدرش يفرق بين البلاستيك و أكله ، لأنه ببساطة بيفتح بقه وياكل اللي قدامه، وإيه حصل بعد كدا؟ 
السمك بيختل نظام هرموناته وبيفقد قدرته على العوم والتكاثر، أو بياكل بلاستيك ومابيقدرش يخرجه لغايه ما بطنه تتملي بلاستيك ويموت، ولو عاش السمك، الإنسان بيصطاده وبياكله فبتوصله الهرمونات المتلخبطة دي وبتأثر عليه، وفي أبحاث بتربط بين تشوهات الأجنة و إختلال نظام هرمونات الإنسان وإستهلاك السمك.
دي بعض الصور من فيلم مهم اسمه Plastic Ocean  أتمني تشوفوه هيزيد كتير في الوعي وإدراك حجم المشكلة.

البلاستيك صعب يعاد تدويره ، 90% منه ماينفعش يعاد تدويره وبيستخدم مرة واحدة، لكن في مواد طبيعية زي الزجاج و الستانلس و الورق نسبة إعادة تدويرهم أعلى أو الخشب والورق بيتحللوا سريعاً في البيئة لأنهم مواد طبيعية، لكن قطعة بلاستيك ممكن تقعد مئات السنين علشان تتحلل.

إزاي أتخلص من البلاستيك:

 - في البداية، رحلة التغيير من البلاستيك هي رحلة طويلة، وابدأها بالتدريج مش لازم تتخلص من كل البلاستيك في يوم واحد.

- ابدأ بإبعاد الأطفال عن البلاستيك، وخاصة الألعاب الرخيصة البلاستيك، أطباق الأكل اللي بيتحط فيها أكل وخاصة سخن. -  ماترميش كل البلاستيك اللي عندك في المطبخ، استخدمه في تخزين اللعب، أو الأدوات واستخدمه لنهاية عمره الإفتراضي أقصي ماتقدر.

- ابدأ بوقف استخدام أخطر أنواع البلاستيك على الصحة : بلاستيك زجاجات المياه المعدنية، بلاستيك الفويل اللي بيتحط في الأكل، بلاستيك المعالق و الشوك اللي بتستخدم مرة واحدة.

- ابدأ بتخفيض البلاستيك اللي بتشتريه، للأسف زمان كنا أفضل كتير، بنشتري من العطار البقوليات، و من البقال الحلاوة والجبن سايبة، و من الفكهاني الفاكهة وكان بتتلف بورق كرتون مش بلاستيك، دلوقتي انتشرت السوبرماركت الكبيرة اللي بتلف كل حاجة في بلاستيك، فارجع تاني دور على الناس دي واشتري منها.

- وأنت بتشتري حاجة من السوبر ماركت اختار الإختيار الصح، زي مثلا شراء المربي، هتلاقي اتنين علبة بلاستيك ، وعلبة زجاج ، اشتري الزجاج.

- ابدأ أعمل شنطة للسوق قماش تستخدم كل مرة تروح، واعمل شنط قماش صغيرة تحط فيها الفاكهة والخضار، ممكن تستخدم مخدات أو ملاية قطن قديمة. 

- خد علبك معاك وأنت رايح تشتري من السوبر ماركت واطلب يتحط فيها الأكل السايب زي المخلل، الجبن. 

- ارفض البلاستيك الزائد عن حاجتك، زي شفاطة في مطعم، علبه للف الأكل الزائد، أكياس زيادة.

- أخيرا كلنا بنستخدم بلاستيك غصب عننا، زي علب الأدوية، أو اللابتوب، أو النظارة، لأن مافيش بدائل و كل دي حجات أسياسية، مش المطلوب إننا ننتخلى عنها، لكن الفكرة إننا نستغني عن الحجات اللي نقدر نلاقي لها بديل تاني علشان صحتنا وصحة أولادنا وعلشان البيئة.


بدائل البلاستيك:

- المرتبة والمخدة و اللحاف : قطن ( ماتحطش وشك وتتنفس في بلاستيك 8 ساعات في اليوم ! )

- ببرونات الأطفال : زجاج و الجزء الطري منها لاتكس بدل سيليكون ( أغلى لكن صحة الأطفال أغلى ) 

- أطباق و معالق و علب الأطفال  : ستانلس ( الستانلس آمن وغير قابل للكسر )

- الحلل التيفال، السيراميك ، الغير اللاصقة: ستانلس ، بيركس ، cast iron 

- علب تخزين الطعام : زجاج ( يمكن إعادة استخدام كل برطمانات الزجاج اللي بنشتري فيها المربي أو العسل، ونصيحة عند الشراء، حاول تشتري الحجم الأكبر عشان يكون برطمان كبير ينفع لاستخدامات أكتر. )

- معالق تقليب الطعام : خشب ، ستانلس.
- زجاجات المياه : داخل البيت زجاج، وخارج البيت ستانلس.
- ألعاب الأطفال البلاستيك : خشب وقماش وستانلس.

شكرا لقراءة التدوينة، وعلقوا لو حابين أصورلكم أكتر عن البدائل اللي بستخدمها في البيت، انشروا الموضوع مع أصحابكم ، وتابعوا صفحتنا على الفيس بوك من هنا.

تحديث ..  هل بلاستيك رقم 5 آمن ؟ 
لأن في قراء للمدونة سألوا كتير على بلاستيك رقم 5 هل هو آمن ولا لأ؟ 
الإجابة للأسف لأ، هو في مواد كيميائية أقل من الأرقام التانية، لكن مازال مصنوع من مواد كيميائية وبترولية بتسبب مشاكل في الهرمونات و الصحة.
و ده بحث ممكن تقروه من 2011 بيتكلم عن إن كل أنواع البلاستيك مازات مضرة لصحة الإنسان، ومافيش بلاستيك 100% آمن لصحة الإنسان.
وفي فيلم Ocean plastic  في جزء عن معمل متخصص لقياس ضرر البلاستيك، وبعد القياسات كانت النتيجة مازال بلاستيك 5 بيطلع استروجين بكميات بتأثر على صحة الإنسان و خاصة الأطفال.
فالإختيار شخصي، قرر إيه ممكن تستغني عنه، وإيه مش ممكن دلوقتي واستعمل 5 ، لكن حاول تمنع استخدام البلاستيك في حجات الأطفال لأن جسمهم أكتر حساسية للتأثر بالكيماويات.  
و طبعا مازال تأثيره على البيئة نفس التأثير لأنه بيترمي في المحيطات و البحار بعد كام سنة و بياخد سنين طويلة أوي علشان يتحلل.
وأخيراً شخصياُ أنا لسه بستخدم بلاستيك ، لأن دي رحلة طويلة، مش مطلوب تصحي ترمي كل الحجات اللي عندك، أنا بدأت بمراحل بتغير كل المطبخ ودلوقتي مابستخدمش بلاستيك في الأكل في البيت، لكن لسه شغالة على تجهيز علبة للأكل برا من الستانلس، معلقة وشوكة وسكينة وشفاط و كوباية للأكل لما بعمل dish party  مع أصحابي بدل استخدام البلاستيك، و بدور على علب ستانلس بتتقفل كويس علشان أخد فيها الاكل برا البيت للغدا في الحديقة أو التصبيرة برا البيت بدل الزجاج دلوقتي، كل ده لسه بعمله لأنه محتاج وقت وتكلفة ، لكن طالما في وعي و بدأت تقريبا مابشتريش بلاستيك فدي خطوة مهمة بدأتها وماشية على الطريق الصح. 
علقوا وقولولنا إيه الخطوات اللي بدأتوها أو هتبدأوها بعد قراءة الموضوع ده ؟  

اللي يحب يقرأ أكتر عن الموضوع ويشوف الأبحاث المتعلقة بيه :  Life without plastic