خلاصة الكتاب اللي هيغير حياتك .. سحر الترتيب بالطريقة اليابانية

القراء الأعزاء.. 

وحشتوني ..

بما إني كنت بنقل لبيت جديد الفترة اللي فاتت، ماقدرتش اكتب تدوينات جديدة، فحبيت أرجعلكم بكتاب قريته من 3 سنين، ورجعت قريته تاني وأنا بنقل عشان حسيت إني محتجاه وأنا بنقل بيت جديد، علشان أخد دفعة تاني وأرتب البيت بطريقة أحسن.
وعايزة أوريكم درج الشرابات بتاعي، لو أمي شافته مش هتصدق و هتقولكم دي اللي كانت بترمي كل هدومها على السرير، وتنقلهم  المكتب لما تيجي تنام، وبعدين تنقلهم تاني على السرير لما تصحى عشان تذاكر :D  :

الكتب اسمه "سحر الترتيب اللي هيغير حياتك" لكاتبة يابانية اسمها كون ماري، طبعاً عارفين اليابانين ونظامهم ، ورغم إن بيوتهم ضيقة جداً " جداً" ، لكن بتكون منظمة وحياتهم بسيطة جميلة . وطريقة التنظيم اللي في الكتاب اتسمت باسمها بعد كدا، الكتاب عمل ضجة كبيرة لما نزل وباع اكتر من 2 مليون نسخة، وكتير بدأوا رحلة التغيير من الكتاب ده. 

أنا هأقولكم الخلاصة هنا، لكن الكتاب في تفاصيل كتير جميلة ومفيدة ، ممكن تشتروه و تقروه من هنا 
وادخلو اتفرجوا على الصور في تقييم الكتاب على امازون من هنا، التحول من قبل لبعد.

يالا نبدأ .. 

هل تعرف إن عدم تركيزك في المذاكرة او القراية ممكن يكون بسبب عدم ترتيب أوضتك؟

هل تعرف إن صحتك النفسية والجسدية بتتأثر وأنت بيتك مش مرتب؟ وحتى علاقتك بأولادك وزوجك ؟

هل حاولت ترتب بيتك مرات كتير وكل مرة بيرجع تاني يتبهدل؟

هل سمعت النصائح بتاعة " رتب كل يوم حتة صغيرة" ، "اشتري دولاب جديد للتخزين" ، "كل ما تشتري حاجة جديدة اتخلص من حاجة قديمة" وكل النصائح دي مانفعتش؟ وبيرجع البيت غير مرتب تاني؟

إذن الكتاب ده ليك، لإنه هيوضحلك الأسباب الحقيقة لـ:
                         ليه بيتك مش مرتب؟ 

في البداية

لازم تعرف إننا في عالم أكتر وظايف ممكن تاخد فيها مرتب، هي التسويق، الشخص اللي مهمته يخليك تشتري حاجة أنت مش محتاجها، الإعلانات في التليفزيون بتأثر عليك، العروض في المحلات، إعلانات الإنترنت، حتى فيديوهات اليوتيوب اللي بتخليك تفكر في حجات جديدة تضيفها لقايمة الحجات اللي عايز تشتريها، الناس المشهورين اللي بيدفعونا إننا عايزين نكون زيهم وعندنا الحجات اللي عندهم. مواقع التواصل الإجتماعي اللي بقى الكمال بقت الصورة اللي كلنا عايزين نوصل ليها، بيت كبير ، فيه كل الأجهزة الكهربائية، هدوم كتير، أحذية كتير، اكسسورات كتير .. 

كل ده خلى أي حد في الدنيا يشتري حجات علشان هو عايزها " مش محتاجها" ، حجات بتخليك وقتها مبسوط وأنت بتشتري ويمكن بعد يومين او أسبوع من الشرا، لكن بعد كدا بتبقى حمل كبير عليك، بتدخل بيتك تاخد مكان، تتركن في دولابك تحسسك بالندم انك دفعت فيها فلوس، تقع من مكانها تخلي بيتك غير مرتب ، تشيلها من الأرض فتاخد من وقتك ومجهودك.

فدلوقتي جه الوقت اللي تتخلص من كل الحمل ده، وزي ما بيقول الأجانب " تدعها تذهب" let it go 

طريقة كون ماري ممكن نلخصها في الخطوات دي: 

الخطوة الأولي:

اعرف أسلوب حياتك

اعرف كويس انت عايز إيه، عايز بيتك مرتب ؟ عايز الطاولات والأسطح تكون فاضية؟ عايز يبقى البيت من غير حاجة مرمية على الأرض؟ اتخيل البيت اللي نفسك تعيش فيه كويس، واعرف إن اللي نفسك فيه ده هو اللي بيتففق مع شخصيتك وهو اللي هيحسن من نفسيتك وتفكيرك، لأن كل حاجة حوالينا بأثر عليها وبتدينا طاقة إيجابية أو سلبية.

وده ممكن اثبتهولك في موقف حصلنا كلنا، كل مرة كنا بنكون عايزين نذاكر بنروح ونرتب المكتب، ده لإن عقلنا بيرفض البهدلة والحجات الغير منظمة، ومابيعرفش يشتغل في الجو ده.
و كون ماري بتقول إن ناس كتير بعد مابتستخدم طريقتها بتخس أو بتنجح في شغلها او بتنجح في علاقاتها، لأنه اتخلصت من حمل كانت شايلاه وهي مش حاسة، وبقى عندها طاقة تبذلها في حجات تانية أهم.

الخطوة التانية

ابدأ حفلة الترتيب مرة واحدة

اتكلمت كون ماري عن إن فكرة ترتيب كل يوم جزء بتفشل، لأنك غالبا بتاخد الحجات من مكان تحطها في مكان تاني ، وترجع تاني ترتب الحجات نفسها في المكان التاني وهكذا، لكن طريقة كون ماري بتعتمد على انك هترتب كل الحجات الموجودة في البيت من نفس النوع في نفس الوقت، مثلا كل الأحذية اللي في البيت في يوم واحد، فبكدا تضمن انك شوفت كل الحجات الموجودة عندك وتقدر تختار منها اللي هتخليه وهتحطه فيه، وايه اللي هتتخلص منه.

ماتستعجلش، ممكن عملية ترتيب البيت دي تاخد منك أسبوع كامل أو شهر، لكن بعد ما تعمل كل الخطوات دي، غالبا مش هتحتاج ترتيب بيتك تاني لفترة 6 شهور.

الخطوة الثالثة 

خطوات الحفلة

كون ماري بتنصح بترتيب معين لترتيب البيت : 

1- الملابس

2- الكتب

3- الأوراق

4- الأشياء الأخري

5- الأشياء المرتبطة بالذكريات.

وكل واحدة من دول ممكن يكون تحتها حجات تاني زي مثلا الملابس: البلوزات، البنطلونات، الملابس الداخلية، الفساتين .. 

هنشرح بمثال إزاي هترتب .. مثلا البنطلونات :

اجمع من البيت كل البنطلونات اللي عندك ، شيلهم من الشماعات وحطهم كلهم على الأرض، لازم تحطهم على الأرض مش مجرد معلقين في نفس المكان في الدولاب، اتأكد إنك جمعت كل الحجات اللي في البيت، لأنك لو لقيت حاجة كنت ناسيها فمعناها إنك مش محتاجها فهتتخلض منها تلقائياً.

امسك كل بنطلون، لازم تمسكه بإيدك وتحس بتقله وبقماشته، ده هيساعدك تاخد القرار،  واسأل نفسك سؤال واحد: " هل البنطلون ده بيفرحني؟ " spark joy زي ما كون ماري بتقول ، أيوة إحنا بننبسط لما نلبس لبس معين، هو ده اللي إحنا عايزين تخليه بس في دولابك، تخيل كل يوم تلبس لبس بيفرحك وتأثيره على نفسيتك؟ ، هتلاقي بنطلونات كتير انت سايبها بس احتياطي لكن مش بتفرحك، او بنطلونات كانت هدية لكن مش بتفرحك، او بنطلونات ضيقة لكن سايبها لما تخس، بنطلونات جبتها عشان علشها تخفيض، بنطلون عجبك التصميم بتاعه بس مالقتش اللون اللي انت عايزه في المحل، فجبت لون تاني ماحبتهوش أوي.
 ده الوقت انك تتخلص من كل دول ، " التخلص عن طريق التبرع، او هدية لحد من أهلك وأصحابك، او انك ترميها لو قديمة جداً " ، أنت مش محتاج في حياتك حجات تعمل زحمة لسبب تاني غير انها بتفرحك، لو مش عارف تقرر جرب تلبسها، وبص في المراية، اسأل نفسك لو بشتريها دلوقتي هاشتريها تاني؟ لازم تقرر في الوقت ده ومافيش خيار مش عارف او هاشوف كمان شوية، القرار إما تسيبها عشان بتفرحك، أو تتخلص منها 

هتتفاجئ بكم الحجات اللي عاملة زحمة في حياتك وهي مش بتفرحك، كون ماري بتقول ان أغلب البيوت اللي بتروح ترتبها ، العملاء بيحتفظوا بس بتلت حجاتهم و الربع في بعض الأحيان، تلت حاجاتهم بس اللي بيفرحهم، وبيطلعوا من 20 ل 200 كيس كبير مليان حجات مش بتفرحهم.

الخطوة الرابعة 

نصائح أثناء الحفلة

- وأنت بترتب ماتشغلش التليفزيون، ماتسمعش أغاني، لو عايز اسمع موسيقي هادية فقط، أنت محتاج تركز، وتاخد قرارات بدون أي إزعاج او مؤثرات.

- لازم تاخد قرار في كل حاجة يا تسيبه عشان بيفرحك، يا تتخلص منه، ماينفعش تعمل كومة جديدة لـ " هأبقى أقرر بعدين " .

- و أنت بترتب الكتب اسأل نفسك كام مرة رجعت قريت كتب احتفظت بيها؟ هل انت خلاص اخدت المعلومات اللي محتاجها؟  الكتب ممكن تستخدمها كهدايا لأصدقائك، أو تتبرع بيها لأقرب مكتبة، تخيل الكتب انها مش سعيدة وهي ماحدش بيمسكها وبتستخدم فقط للديكور، لكن هتكون أسعد لو اتفتحت كل شوية بايد مختلفة واتقرت.

- في وضع إقتصادي سئ، و لو دخلك مش كبير، أكيد هيبقى عندك تردد تتخلص من كل الحجات اللي بتسببلك حمل لمجرد انك دفعت فيها فلوس قبل كدا، أو يمكن تحتاجها بعد كدا، لكن افتكر ان المقصود من الطريقة مش انك ترمي كل حاجاتك، انت بتحتفظ بالحجات اللي بتسبب لك سعادة وده هيفتح لك فرص في الحياه جديدة، لانك بتخلصك من كل الحجات اللي بتسببلك حمل، أنت بتصفي عقلك ونفسيتك وده هيحسن علاقتك بعيلتك، و هيخليك تفكر في أفكار جديدة، وتبدأ مشاريع جديدة، هتعرف بالظبط إيه ستايل لبسك والحجات اللي بتحبها عشام لما تشتري بعدين تعرف تختار كويس، وهتعلم درس عميق إن القرارات الغلط اللي اخدتها قبل كدا في الشرا مش هتكرر تاني ( زي مثلا اشتريت حاجة لمجرد انها في السيل، ودلوقتي بتخلص منها عشان مش بتفرحني فيعد كدا هاشتري اللي بيفرحني بس ) ، هيوسع مكان في البيت تقدر تلعب فيه رياضة ، هيوفرلك وقت بدل من التريب تقدر تقرا كتاب، تقدر تقضي وقت أطول مع اصحابك وعيلتك.

فقاوم رغبة احتفظ بالحجات just in case  يمكن احتاجها، افتكر انت احتفظت فيها أد إيه وماحتجتهاش! 

اشكرهم على انهم ساعدوك في فترة في حياتك، وساعدوك تعرف ستايلك والحجات اللي بتريحك وبتحبها، وتخلص منهم بسلام! 

الخطوة الخامسة

بعد الحفلة

- تخلص من كل الحجات اللي طلعتها مش محتاجها فوراً، وبعدين ابدأ بترتيب الحجات اللي بتحبها، تخيل دولابك دلوقتي كله حجات بتخليك سعيد  هييه! ، دلوقتي كمان معاملتك للحجات دي هيبقى بحب وبإحترام أكتر، وهتلاقي انك عرفت استايلك وطريقتك وهتعرف بعد كدا وانت بتشتري ايه المناسب ليك بالظبط.

 - كون ماري بتنصح باستخدام الادراج لترتيب الملابس، وترتيب الملابس بطريقة رأسية مش أفقية، يعني اللبس مش فوق بعضه لكن جنب بعضه، زي صورة درج الشرابات اللي في أول التدوينة ، فتقدر تشوف بالظبط أنت عايز ايه وايه الحجات اللي عندك بدل ما يبقوا تحت بعض وماتشوفهمش، وبتنصح بتطبيق أكبر قدر من الملابس مش تعليقها علشان ده بيحافظ على عمرها أكتر من التعليق، وبتقول إنه لو فاكر التطبيق بياخد وقت فانت غلطان، التطبيق بيفرحك، لما تفتح درج وتلاقي الحجات مرتبة انت بتفرح 
شوفتوا الدرج شكله يفرح إزاي 

الشرابات ليها طريقة للتطبيق شوفوها على يوتيوب علشان تحافظ على عمرهم أطول من الطريقة التقليدية.
و كون ماري بتنصح بالترتيب الأفقي لكل الحجات عشان لما تغشل وتبدأ تحط الحجات النظيفة تحطها من جوا الدرج فتستخدم كلهم بنفس المعدل بدل من إستخدام شوية اللي قدام ونسيان شوية جوا ورا في الدرج.

وكمان بتنصح بترتيب الدرج من برا فاتح لجوا أغمق ، لأن التدرج في الأولوان ده بيدي إحساس أكبر بالراحة والترتيب. 

 في طرق كتير لتطبيق الملابس بداية من الشرابات والتي شيرتات، ابحث على يوتيوب Kon Marie method folding هتلاقي 

ودي بعض الأمثلة:

  المصدر

تطبيق الملابس الداخلية: 

تطبيق الشرابات :

- في بعض الحجات اللي مش بتخليك سعيد لكن هتضطر تسيبها زي الأوراق الرسمية مثلاً، اتأكد انك بترتبهم كويس في ملفات علشان تعرف ترجعلهم، وتاخد انك تخلصت من الورق اللي ملهوش لازمة زي كتالوجات الأجهزة اللي بسهولة ممكن تلاقيها أون لاين، أو فواتير قديمة أو غيره. 

- دي قايمة بكل الحجات الموجودة في البيت اللي ممكن تبدأ بترتيبها: 

المصدر

- كون ماري بتنصح بعدم وضع أي شئ على الحوض في الحمام أو المطبخ، وإن الحجات تكون متخزنة تحت الحوض مثلا وتطلعها وقت الإستخدام بس. 

- كون ماري بتنصح بإنك تشيل اللزق على العلب زي مثلا غسول الوجه او مزيل العرق، لأن الكلام الكتير حواليك بيشتت، والحجات هيبقى شكلها أفضل من غير الورق. 

تجربتي الشخصية : 

أنا قريت الكتاب من 3 سنين تقريباً، وفعلاً غير في حياتي وخلاني أبص للأشياء بطريقة مختلفة، الكتاب كمان في تفاصيل كتير، أنصح أي حد يقدر يقراه يقراه، لأنه بيرد على كل الأفكار اللي هتيجي في بالك ، وتطبيق الكتاب من امتع الحجات اللي هتعملها،  أنا بيتي مثلا فيه 4 أطباق كبار 4 أطباق صغيرين 4 أطباق للشوربة، عندي حلتين وطاستين، عندي 2 برا، عندي 2 جاكيت، 5 بنطلونات، عندي 4 شنط ، لكن كل دول أنا بحبهم وبستخدمهم وأنا مبسوطة لأنهم بيسببوا لي سعادة ، وعندي حاجات عددها كبير بردو لكن بستهدمهم كلهم وبيفرحوني كلهم زي 12 شراب مثلاً ، والحجات القليلة مش معناها إنك مضغوط أومش مرتاح بالعكس، ده تخليك هادي من جواك و مش مهتم بالأشياء و بتهتم أكتر بالتواصل مع الناس و معرفة أصدقاء جداد وقضاء وقت معاهم بدل وقت ترتيب البيت، بتخليك و أنت بتشتري حاجة بتفكر انا هأحطها فين وهتتماشي مع الحجات اللي عندي ولا لأ، الطريقة دي وفرتلي وقت أطول مع بنتي و إني أهتم بيها وبتربيتها، ووقت أول ليا إني أقرا وأتعلم حجات جديدة، ومازالت لسه بشتغل على نفسي في ترتيب البيت ماوصلتش للتصور اللي في دماغي.

أتمني الكتاب يكون فادكم، وقوليلي تحبوا الكتاب الجاي يكون عن إيه وإيه الأسئلة الل عندك؟