باقي فصول الكتاب من هنا
- عقل الطفل بيتكون من شبكات عصبية ( خطوط مشبكة في بعضها) ، كل تجربة أو علاقة مع الطفل بتكون شبكات جديدة.
- أول ٣ سنين من حياة الطفل أهم فترة لتكوين الشبكات العصبية، لأنها الأساس اللي بيتبني عليه معتقدات الطفل زي هل أنا محبوب ولا لأ ، هل الدنيا أمان ولا لأ، هل أقدر أنجح ولا لأ، كل تصرف بيقوم بيه الكبار مع الطفل بيأثر على تكوين الشبكات العصبية .
- بمرور الوقت الشبكات اللي مش بتستخدم و تطور بتجارب بتلغي نفسها وبيقل عدد التشبكات في المخ، و بيكون أصعب في المرة التانية على المخ استيعاب التجارب أو المعلومات تاني. ( التكرار حاجة مهمة جداً خلال الطفولة )
- الجينات لها علاقة بصفات الطفل، و في أبحاث بتوضح إن الأم أو الأب المتشائمين أو المتفائلين بتتنقل الجينات دي للأطفال و بيطلعوا زيهم، معني كدا إيه لازمة التربية ؟ التربية لها عامل أكبر بكتيرلأنها بتهيأ البيئة للطفل لإستغلال الجينات دي و تأكيدها ، أو التقليل من تأثيرها + إن في صفات كتير جداً ممكن تتزرع في الطفل بالتربية ملهاش علاقة لغاية دلوقتي بالجينات.
- الأم و الأب هما المسؤلين عن أهم سنوات لتكون عقل الطفل أول ٣ سنوات ، وعليهم إنهم يملوها بالحب و الإهتمام و الإحتواء للطفل لمساعدته على بناء وصلات عقله بشكل أفضل، ال ٣ سنين دول هما اللي بيشكلوا صورة الإنسان عن نفسه و عن حياته كلها.
- هل لو العقل بيتكون بالسرعة دي أول ٣ سنين، هل المفروض أدي للطفل أكبر قدر من المعلومات علشان يعرفها بسرعة؟
الأبحاث بتقول لأ إن الطفل مش هيتعلم بالتلقين أول ٣ سنين تماما، هيتعلم بطريقة واحدة وهي عن طريق إيده و إكتشاف اللي يمسكه بإيده، فسيب الطفل يتجول في البيت براحته، يفتح الادراج ويمسك الحجات، قدمله حجات ملمس و أصوات مختلفة ، دي الطريقة الوحيدة للتعلم في السن ده.
- كمان الأبحاث بتقول إن لو استعجلت وحاولت تعليم الطفل حاجة فوق سنه و فهمه، هيواجه صعوبة كبيرة و هتثبت في الوصلات العصبية بتاعته إن الموضوع ده صعب ( الرياضيات مثلا) أو إني مش ذكي كفاية و ممكن يوصل إنه هيعاني طول حياته من الموضوع ده.
- بعض الأبحاث بتقول إن أي وقت بيقضيه الطفل قدام الشاشات بدون تفاعل ممكن يأثر على قدرته على التركيز و الإستماع و التعلم طول حياته.
- أكتر حاجة الطفل محتاجها في أول ٣ سنين مش موجودة على الشاشات، و لا موجودة في الكروت التعليمية ، لكن هو محتاج علاقة و تفاعل سليم مع كل اللي حواليه ، ده أكتر حاجة بتساعد عقله على التطور بشكل سليم.
- تغير الحفاضات و الأكل و تغير اللبس و التحميم، كل دي أكبر جزء من العلاقة أول ٣ سنين ، فلازم تتعمل بشكل يقوي العلاقة عن طريق إنك تعملها بحب وتبتسم للطفل وتغني وتخليه يشارك معاك فيها اول ما يبدأ يقدر.
- الطفل محتاج إنه يجرب يلبس حذائه بدون ما الأم تستعجل وتاخده منه تلبسه، محتاج لما يطلع المواعين من المطبخ يلعب بيهم الأم ماتقطعش تركيزه وتاخدهم تدخلهم لما تحب تمشي م المطبخ هي، الطفل محتاج بيئة ترحب بيه و يكون له حرية و مساحة فيها للتعلم.
- العلماء اكتشفوا خلايا عصبية مسؤلة عن المحاكاة و التقليد و التأثر بالآخرين ، فالطفل لما بيشوف الأم هادية بيكون هادي، و لما بتتوتر بيتوتر وهكذا ، فالأم لازم تكون قدوة و تعمل اللي عايزة تشوفه في ابنها، لانها لو اتعصبت مهما قالت للطفل اهدى مش هيهدي و هي متعصبة.
- في دراسات اتعملت على أطفال من الولادة لغاية ما كبروا، ولقوا في علاقة بين إحساس الطفل بالامان و الترابط في أسرته وعلاقته القوية بأسرته ، و مستواه في المدرسة و ثقته في نفسه و قدرته على حل المشاكل و قدرته على عمل علاقات سليمة في حياته.
- الأطفال اللي بتتعرض للعنف النفسي و الجسدي في البيت أو بتتعرض لحادثة أو توتر كبير بتصاب بصدمات، بتؤدي لمشاكل عندها زي صعوبة في النوم، كوابيس و فزع ، صعوبة في التعلم و التركيز، ومن أعراضها نوبات غضب شديدة جدا على شئ صغير بالنسبة لك زي انك ماحطتيش للطفل في كوباية معينة هو عايزها، حكي نفس القصة من الطفل مرات كتير ، اللعب باللعب بنفس الطريقة و الترتيب، عدم اظهار اي مشاعر في التعامل.
الصدمات دي ممكن تتعالج ، العلاج الوحيد ليها هو الصبر و الحب من طرف الأهل ، و العمل على بدء علاقة جديدة كلها حب و أمان و تواصل مع الطفل . ( لو المرحلة متقدمة بتحتاج مساعدة من طبيب متخصص )
- تغير الحفاض وقت اللزوم، تقديم أكل للطفل وهو جعان، الرد على ابتسامة الطفل بابتسامة، فهم لما الطفل يحتاج ينام فأحطه في السرير، كل دي حجات بتبني الثقة مع الطفل، بيحس الرعاية و الحب منها، فهم إشارات الطفل وهو بيحب ايه ومابيحبش ايه أساس لعلاقة سليمة و قوية مع الطفل.
- الطفل محتاج تلمسه وتحضنه، كل شوية تقوله عايز حضن؟ لازم يتعلم أهمية التواصل الجسدي وإزاي يعبر عن حبه، عن طريق تعبيرك عن حبك له بدون خجل.
- اللمس من أهم الحجات اللي بتساعد على تطور عقل الطفل و إحساسه بالحب ، احضن الطفل، المس شعره، امسك ايده.
- الطفل محتاج تكلمه حتى لو مابدأ ش الكلام، ده بيحفز عقله على إنه يبدأ يرد وبيتعلم الكلام أسرع.
والطفل بيحتاج للتكرار مرات كتير، حتى لو بالنسبة لك ممل، بالنسبة كل مرة بيكتشف حاجة جديدة.
- الطفل محتاج لنغمات وموسيقي، اكتشفوا ان الموسيقي بتنمي الإبداع، وبتساعد المخ على الإسترخاء، غني لطفلك بصوتك حتى لو شايفة إنه مش حلو ، هو بيطمنه جداً ، جربي تغني للطفل كل يوم قبل ما ينام أغنية هادية هتلاقيه بدأ يسترخي ويستعد للنوم.
- اللعب هو شغل الطفل ، هو بيكتسب منه خبرات في العلاقات مع الناس و الأشخاص، أيا كانت اللعبة ، شارك الطفل ، و خليه هو يختار تلعبوا بيها ازاي زي مثلا يمررهالك و ترجعهاله تاني ، او يحركها بطريقة معينة ، اديله حريته في اللعب.
- شاركي الطفل وقت لعبه، خليه هو يختار تلعبوا إزاي، يديلك العبة وياخدها تاني، ولا أنتي تحطي حاجة وهو بعدك، خليه يقود اللعبة وأقعدي معاه بكامل تركيزك ألعبي.
- اسمحي للطفل يوسخ هدومه ويقطعها!
الأطفال بتتعلم وهي بتمسك الرمل والطينة ، والهدوم هتتغسل وهيكبر عليها و مش هيلبسها يوم، لكن اللي هيتعلمه والذكريات اللي هيعملها من لعبه في الطينة هي اللي هتفضل معاه وهتأثر على شخصيته، مش بس تسمحي للطفل يلعب في الطينة، ألعبي معاه وشاركيه، ده هيقوي علاقتهم وتواصلكم مع بعض.
- المرجيحة وكرسي العربية وكل الحجات اللي بتقيد الطفل، ممكن تكون مفيدة لو استخدمت وقت قصير جداَ ووقت الحاجة، لكن الطفل محتاج يقعد في البيت على الأرض ويتحرك في كل مكانـ ويكتشف كل مكان.
- الطفل مش محتاج عربية بتتحرك بحجارة و بتعمل صوت مزيكا، بالعكس دي بتساهم في انها تخلي عقله مايشتغلش لانه مابيعملش حاجة او مش مستوعب ايه بيحصل،الطفل محتاج العاب يلعب بيها بكل حواسه و يفكر زي رمل ، مكعبات ، صلصال.
- لو الطفل بينلك إنه مهتم بحاجة معينة، ركزي معاه فيها، هاتيله كتاب عنها، اعمليله نشاط جديد بتعلم اكتر عنها، خديه مكان يشوفها فيه أكتر، دي فرصة للتعلم ماتضيعهاش.
- لازم يكون في توازن في دلع الطفل، لأن لي دلع بيفسد الطفل، الفاصل هو بين الاحتياجات و الرغبات ، المفروض نلبي كل احتياجات الطفل، لكن الرغبات لازم ماتتحققش كلها و نحقق المفيد او اللي في استطاعتنا منه ، وكل أم بتحكم على الرغبات دي حسب المناسب ليها.
- فضي وقت مع طفلك مابتعملوش حاجة، اقعدوا على السرير احضنيه، زغزغيه، استخبي تحت البطانية ، امسكي ايده.
- كل أم بتقول " أنا مش ممكن أذي طفلي" لكن الشتيمة والزعيق، واللوم والعقاب هو تدمير لعقل الطفل حرفياً ، يمكن الأذية مش باينة زي جرح مثلا في الأيد، لكن هي جرح كبير وبيفضل مدي الحياه.
- في أمهات بتواجه إكتئاب ما بعد الولادة، وفي حالات كتير بتوصل لأذية الأم أو الطفل، فلازم تطلب من اللي حواليها المساعدة، ولو احتاج الأمر تلجأ لطبيب متخصص. إهتمامك بنفسك هو إهتمام بطفلك.
- بيتك مش دايماً هيبقى نضيف، ودولابك مش هيبقى دايماً مرتب، وغسليك دايماً مش هيبقى في مكانه ، مش لازم ده يأثر عليكي، رتبي أولوياتك وهتلاقي أول أولوية طفلك، قصي معاه وقت أهم من المطبخ والغسيل.
- أول 3 سنين في حياة الطفل، هيتسمروا معاه طول حياته، و الإدراك هو اول خطوة للمعرفة، والمعرفة بتساعدنا ناخد قرارات أحسن ، فقرري إزاي تحبي تكون حياة طفلك كلها.
- الأطفال بتحتاج وقت لوحدها، فلما تلاقي الطفل قاعد بيبص على ايده ، او وانت بتحاول تلعب معاه سابك و مشي ده معناه انه عايز يقعد لوحده فاديله حريته في الراحة.
-الإدراك هو أول خطوة للتغير، بمجرد إدراكك لإيه مفيد لطفلك و إيه ضار، الخطوة التانية هى قرار التغيير ، افتكر دايما إن أول ٣ سنين هما دائمين في حياة الطفل، هما اللي بيشكلوا حياته.
- الطفل مش محتاج لأم مثالية، ومافيش أصلا أم مثالية، الطفل محتاج لأم بتحبه، وبتفهمه، وبتتعلم من أخطائها وبتسمحله يتعلم من أخطائه، وبتديله عطب ودفء وبتزرع ثقة في علاقتهم.
أتمني تكونوا استفدوا من أول 3 فصول وانتظرونا في باقي الفصول لتتعلم أكتر عن التهذيب الإيجابي وإزاي نطبقه مع أولادنا.
باقي فصول الكتاب من هنا
رائع شكرا جزيلا لمجهودك
ردحذفجزاك الله خيرا أنا مدرسة في الحضانة والكلام مفيد جدا
ردحذفعندي سؤال انا بنتي ٤ سنين وللاسف وقعت في بعض الأخطاء منها العقاب والتهديد والزعيق مش بضربها انا الحمد لله بقرأ حاجات وفهمت حاجات مكنتش اعرفها بس إنتي بتقولي ان اول ٣ سنين حيفضلوا معاها طول عمرها معني كده ان انا اذتها ومهما اصلح دلوقتي حتفضل برده في مشكله
ردحذف