من الحجات المهمة جداً للطفل اللي بتساعده على الراحة و الإستقرار النفسي هو الروتين، يعني يكون في نظام ثابت تقريباً يومياً، مثلاً ميعاد النوم وميعاد الإستيقاظ، ميعاد وجبات الأكل، هتلاحظوا إن لخبطة النظام ده بيوتر الطفل وبيخليه يسئ التصرف، مثلاً لو متعود كل يوم بعد المدرسة يروح البيت، لو مرة راح على المحل مثلاً أو روحتو تزوروا ناس هتلاقي الطفل مش مرتاح ويبدأ يسئ التصرف.
النهاردة هنتكلم عن التخطيط، اللي ببساطة سبب فشلنا فيه بيخلينا دول عالم ثالث.
الورقة دي هي جدول بنتي الأسبوعي ( هي 4 سنين ) ، وهي أول خطوة في حياتها لتعلم التخطيط ( هدف بعيد المدى )، وتعلم حجات تانية ( هدف قصير المدى) زي أيام الأسبوع و الألوان وإدراك الوقت و الفرق بين اليوم والأسبوع والشهر.
الأسبوع هو أحسن مدة للتخطيط عامة للكبار والصغار لأنه مش قصير زي اليوم ومش طويل زي الشهر، وبيتكرر ورا بعض بنفس الطريقة.
بنقعد مع بعض يوم الأحد ( قبل بداية الأسبوع الغربي) و بنخطط للأسبوع وبنرسم رموز بسيطة للتعبير عن الأنشطة اللي هنعملها زي هنا في الجدول : السباحة ، زيارة المكتبة، الذهاب للطبيب، حصة الرقص، الذهاب للحديقة، الذهاب للتسوق.
بنعلق الورقة في أي مكان الطفل يقدر يشوفه في البيت، و لما يسألك هنعمل إيه النهاردة او بكرة بتقوله شوف الجدول إحنا مخططين لإيه.
نحاول يكون مافيش أحداث كتير مفاجئة خلال الأسبوع، ولو ظهر حاجة نزودها للجدول أول مانعرف، وعادي تحصل مفاجأت بردو أحياناً لكن يكون ده الإستثناء مش القاعدة.
زي الروتين، التخطيط بيساعد الطفل على توقع يومه أو بكره يكون عامل إزاي وبالتالي بيكون أهدي وأكثر إستقراراً.
وطبعاُ نكون قدوة للطفل ونكون بنخطط لأسبوعنا الأول.
عملتلكم نسخة بداية الأسبوع السبت ونسخة بداية الأسبوع الأثنين ، اختاروا اللي بناسبكم وابدأوا مع أولادكم.
لتحميل الصور للطباعة من هنا
ماتنسوش لايك لصفحتنا على الفيس بوك من هنا
ليست هناك تعليقات:
إرسال تعليق