النهاردة هأشارك معاكم نظام (روتين) اليوم بتاع دانة ( 4 سنوات)، الأطفال (و الكبار بردو على فكرة) بيرتاحو في فكرة الروتين جداً، لأن العقل بيكون عارف إيه اللي هيحصل بعد كدا؟ فيبدأ يركز مجهوده في إنجاز المهام المختلفة أو الإبداع أو حتى الإسترخاء. ولو مش مرتاح في حياتك، فأول خطوة تعملها هي إن تعمل روتين، وتبدأ بالراحة ، ممكن تبدأ بس إنك قبل ما تنام تاخد 60 نفس عميق، أو إنك تحدد وقت معين في اليوم للسوشيال ميديا، وهكذا.
نرجع تاني للأطفال، الأطفال بقى لأنهم كمان لسه بيتعلمو التحكم ف المشاعر و التعبير عنها، فلو مش عارف ولا متوقع إيه هيحصل الموضوع بيقلب بنوبات غضب، أو زن أو توتر بدون مبرر بالنسبة لك، لكن بالنسبة له بسبب اللخبطة اللي عايشها.
و عشان نساعد الطفل، اتكلمنا في بوست قبل كدا عن مخطط الأسبوع من هنا
و النهاردة هنتكلم عن الروتين اليومي،أنا شوفت جداول على الإنترنت لكن اخترت إني احطه حوالين الساعة في مكان منخفض يكون الطفل بيشوفه، عشان يقدر بنفسه هو يعرف هيعمل إيه، لأن مع تحرك الساعة، الطفل يشوف الروتين ملموس على مدار اليوم، غير الجدول بالنسبة له مش بيربط بالوقت لأنه أصلاً مش مدريك الساعة ولا الوقت في السن الصغير ده.
أنا صممت شكل البنت في الصور شبه بنتي باستهدام تطبيق اسمه Bitmoji للي يحب يصمم ويعدل، لكن في نسخة جاهزة للطباعة الرابط بتاعها في آخر التدوينة دي.
بعد ما طبعته فكرت إن ممكن نطبع روتين الصبح على ورق بلون مختلف عن روتين بليل ، وده هيسهل للطفل التعرف على الفرق، اللي يحب يعمل كدا.
شاركوا مع صحابكم و انتظرونا في التدوينة الجاية.
صفحتنا على الفيس بوك من هنا
للتحميل من هنا نسخة بي دي أف جاهزة للطباعة ونسخة ورد للتعديل
شكرا ليكي جدا ،من أسعد الصدف إللي حصلت لي في حياتي إني لقيت المدونة دي الوقتي وأنا سهرانة مع بنتي بعمر الشهرين ،بعد ما نيمت إبني إللي زعلته مني النهارده بسبب شقاوته،من ساعة ما لقيت المدونة وأنا حاسه إني شفت كنز ،قاعدة بقرأ كل حاجة ،ربنا يجازيكي كل الخير ،بالمناسبه كنت هسمي بنتي دانة..
ردحذف